Ил Дархан Айсен Николаев Өлүөнэ эбэ күнүнэн эҕэрдэлиир

Саха сирин ытык-мааны олохтоохторо, барыгытын СӨ Бырабыыталыстыбатын салалтатын аатыттан Өлүөнэ эбэбит күнүнэн итиитик-истиҥник эҕэрдэлиибин! 

Былыргы дьыллартан саҕалаан Өлүөнэ эбэтин саха дьонун-сэргэтин аһатан-сиэтэн, маанылаан баччаҕа диэри кэллэ. Ыраас уунан хааччыйар. Өрүс кытылларынан нэһилиэнньэлээх пууннар дэлэйдик үөскээбиттэрэ. Бу сүүнэ өрүһүнэн дьон Саха сирин кииниттэн Хотугу Муустаах байҕалга тиийэн, арктика сиригэр-уотугар хото олохсуйбуттара.

Аатырбыт географическай эспэдииссийэ Евразия саамай хотугу туочукатын, эргимтэтин көрдүүрүгэр Өлүөнэ эбэни туһаммыта. Эспэдииссийэ састаабыгар биллиилээх Семен Челюскин, кэргэнниилэр Прончищевтар бааллара. Билигин авиация уонна сиринэн айан-суола төһө даҕаны сайдыбыттарын үрдүнэн Өлүөнэ эбэ Сибииргэ суол биир сүрүн хорук тымырынан буолар. Хотугу таһаҕас үгүс өттө Өлүөнэ эбэнэн тиэрдиллэр.

Өлүөнэ эбэбит ураты өрүһүнэн биллэр, сураҕырар. Иккис кини курдук өрүс суох. Кини эрэ ирбэт тоҥ сиринэн-уотунан нэлэһийэ устар. Уһунунан Арассыыйаҕа — үһүс, оттон аан дойду үрдүнэн тохсус. Эбээннии «Улахан өрүс» диэн тылбаастанар. Кэлин ити этиини биһиги өбүгэлэрбит Өлүөнэ диэн ааттаабыттар.

Биһиги эбэбит олус ураты кырасыабай. Халлааҥҥа диэри харбаһар Өлүөнэ туруук очуостара национальнай ситиһиибитинэн, киэн туттуубутунан буолар. Арассыыйа саамай ураты сирдэрин-уоттарын испииһигэр киирэр уонна ЮНЕСКО быһаарыытынан аан дойду ураты нэһилиэстибэтинэн буолар.

Өлүөнэ өрүс туруук очуостарынан эрэ аҥаардас биллибэт, сураҕырбат. Манна бааллар тукулааннар, Еланка очуостара, Дириҥ Үрэххэ былыргы киһи олорбут сирэ-уота, Тойон Арыылаахтааҕы тааска суруктар, хайа хаспахтара, күрүлгэннэр бааллар. Өлүөнэ өрүс Саха сирин хас биирдии олохтооҕор улахан суолталаах.

Күндү доҕоттор! 

Өлүөнэ эбэ биһиги баайбыт, кинини кэлэр көлүөнэҕэ анаан харыстыах, араҥаччылыах тустаахпыт. Бүгүҥҥү сайыҥҥы үтүө күнүнэн барыгытын ис сүрэхпиттэн эҕэрдэлиибин. Өлүөнэ эбэбит барыбытын ураты кырасыабай көстүүтүнэн үйэлэргэ үөрдэ турдун, биһиги кининэн киэн туттуубут хаһан да уҕараабатын!