Ил Дархан Айсен Николаев өрөспүүбүлүкэҕэ хоту таһаҕаһы тиэйии хаамыытын туһунан кэпсэттэ

Бүгүн, атырдьах ыйын 14 күнүгэр, Ил Дархан Айсен Николаев СӨ Гражданскай оборуонатын дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйар миниистир Дмитрий Лепчиковтыын хоту таһаҕаһы тиэйии, техногеннай уонна ойуур баһаардарын тула кэпсэттилэр.

«Бүгүҥҥү күҥҥэ хоту таһаҕаһы тиэйии былааннаммытыттан 66,9%-а туолан турар. Дмитрий Николаевич бэлиэтээбитинэн, былырыыҥҥыттан арыый эрдэлээн иһэбит. Ордук болҕомто Арктикаҕа баар өрүстэр навигацияларыгар ууруллар. Таһаҕас тиэйиитэ ыйыллыбыт болдьоҕор тиийэригэр болҕойорго, суһал боппуруостары кэмигэр быһаарарга соруйдум», — диэн Ил Дархан Айсен Николаев телеграм-ханаалыгар суруйар.