Ил Дархан халаан уутугар уонна ойуур баһаардарыгар бэлэмнэнии туругун билистэ

Ил Дархан Айсен Николаев СӨ Гражданскай оборуона уонна нэһилиэнньэ олоҕор-дьаһаҕар куттал суох буолуутун хааччыйыы миниистирин Дмитрий Лепчиковы кытта кутталлаах сезоннарга дьаһалы ылыы, бэлэмнэнии туһунан кэпсэттилэр.

Дмитрий Лепчиков сааскы халаан ааһыытыгар, ол кэнниттэн кэлэр ойуур баһаардара туруон сөптөөх куйаас кэмҥэ бэлэмнэнии туругун туһунан Ил Дархаҥҥа дакылааттаата. Муус устар 17 күнүгэр саҥа дааннайдары түмэн, Саха сиринээҕи айылҕаны кэтээн көрөр сулууспа күн-дьыл туругун чопчулааһыны таһаарыахтаах. Ону учуоттаан халааҥҥа бэлэмнэнии үлэлэр былааннарыгар көннөрүүлэр киириэхтээхтэр.

Айсен Николаев олохтоох дьаһалталары кытта ыксаллаах кэмҥэ бииргэ үлэлэһиини хонтуруолга ылар туһунан дьаһал биэрдэ. Ону сэргэ, гидротехническай тутууларга бэрэбиэркэни салгыы ыытарга, өрүстэр туруктарын тиһиктээхтик кэтиир туһунан эттэ.