Бүгүн, ахсынньы 25 күнүгэр, Ил Дархан Айсен Николаев Дьокуускай куорат Хатаһыгар 120 миэстэлээх оскуола эбии куорпуһа тутуллан үлэҕэ киирэр үөрүүлээх түгэнигэр кытынна. Сарсыарда эрдэттэн Ил Дархан оскуола кэбиниэттэрин кэрийэн көрөн, үөрэнээччилэри уонна учууталлары кытары көрсөн кэпсэттэ, үлэ-хамнас туһунан билистэ. Ол кэннэ оскуола аһыллыытын үөрүүлээх түгэнигэр Хатас олохтоохторун, учууталларын, үөрэнээччилэрин истиҥник эҕэрдэлээтэ.
«Бүгүн биһиги үөрүүлээх быһыыга-майгыга Хатас оскуолатын саҥа куорпуһун аһар күммүт тосхойдо. Хатас сэлиэнньэтэ кэҥээн оскуолаҕа миэстэ тиийбэт этэ. Биһиги дойдубут Бэрэсидьиэнэ Владимир Путин көҕүлээһининэн социальнай эбийиэктэри тутуу бырайыагар киирсэн быйыл үс оскуола тутулунна. Биир — Дьокуускай куорат Прометей оройуонугар, иккис — бу Хатаска, үһүс — киин куорат 26-с нүөмэрдээх оскуолатын эбии куорпуһа. Биһиги үөрүөхпүт иһин, олус кылгас кэм иһигэр, аҕыс ый устата «Сэттэ» хампаанньа оскуоланы тутан үлэҕэ киллэрдэ», — диэтэ Айсен Сергеевич.
Хатас оскуолата агрооскуола таһымнаах, онон үөрэнээччилэр оҕуруот аһын үүннэрэн, сир аһын үргээн, астаан нэһилиэнньэҕэ таһаараллар. Аны быйылгыттан собону хатаран, бороһуок миин оҥорон таһаарбыттарын нэһилиэнньэ хамаҕатык атыылаһар. Итини сэргэ байыаннай дьайыыга сылдьар байыастарбытыгар түргэнник суураллан, миин буолан итиини, сэниэни киллэрэр биир сүрүн ас буолбутун бэлиэтээн, уолаттар махтаналларын билэбит.
Санатар буоллахха, П.Н. уонна Е.Н. Самсоновтар аатынан Хатастааҕы оскуола эбии куорпуһун сыбаайата былырыын олунньу ыйга түспүтэ. Онтон тохтуу түһэн баран, «Сэттэ» хампаанньа тутууну салҕаан аҕыс ый иһигэр үлэҕэ киллэрдэ.
Ааспыт сылларга 900-тэн тахса оҕо үөрэнэр буоллаҕына, билигин номнуо 1000-тан тахсыбыт. Оскуола 2019 с. «Үөрэхтээһин» национальнай бырайыак «Успех каждого ребенка» гранын ылары ситиспитэ. «Агрокуб» федеральнай научнай-үөрэтэр лаборатория тиһигэр киирэн пилотнай бырайыакка кыттар. 2021 с. оскуола «Цифровая образовательная среда» бырайыакка киирбитэ. Ити курдук оскуола оҕонуу үөрэтиигэ, иитиигэ үгүс элбэх бырайыакка кыттар.
Саҥа куорпуска төнүннэххэ, оскуола үс мэндиэмэннээх, 19 аныгылыы оҥоһуулаах, анал оборудованиелаах кэбиниэттэрдээх. Кинигэ харайар бибилэтиэкэлээх, мэдиссиинэ кэбиниэттээх, тэҥинэн 120 оҕо олорон аһыыр остолобуойдаах, 140 олбохтоох аактабай саалалаах, киэҥ-куоҥ успуорт саалалаах, үлэ уруогар аналлаах мастарыскыайдаах, киинэҕэ устар, хаартыскаҕа түһэрэр устуудьуйалаах.
Оскуола саҥа куорпуһун уопсай иэнэ — 4908 кв.м тахса. Онон оҕо үүнэригэр-сайдарыгар бары кыах баар дииллэр оскуола учууталлара.
Дьокуускайга Стадухина уулуссаҕа 14 саастаах уолу кырбаабыт 45 саастаах эр киһиэхэ холуобунай дьыала тэрилиннэ. Бу…
Алтынньы 18 күнүгэр Саха Өрөспүүбүлүкэтин Ил Дархана Айсен Николаев уонна СӨ Судаарыстыбаннай Мунньаҕын (Ил Түмэн)…
Ааспыт нэдиэлэттэн Арассыыйа үрдүнэн ордук үрүҥ ас сыаната үрдээтэ. Алтынньы 8-14 күннэригэр дойдуга сыана хайдах…
“Саха сирэ” хаһыат бүгүн ”Тыа сирэ - уйгу төрдө” диэн анал таһаарыылаах таҕыста. Анал сыһыарыыны…
Саха сиригэр хаһаайына суох бэйдиэ сылдьар кыыллары иитии тэрээһиннэригэр үбүлээһини улаатыннаран, 100 мөл. солк. диэри тиэрдэр…
Социальнай харысхал өрөспүүбүлүкэтээҕи комплекснай киинэ Донбасска Хотугулуу-илиҥҥи көмөнү уонна өйөбүлү оҥоруу пуондатыгар ПАЗ-32054 оптуобуһу туттарда.…