Хаартыска: Андрей Сорокин, ЯСИА.
Айсен Николаев Ил Түмэн салалтатын кытта 2026 сыллааҕы уонна былааннаммыт 2027–2028 сылларга судаарыстыбаннай бүддьүөт туһунан сокуон барылын иккис ааҕыытынан оробуочай көрсүһүүнү ыытта.
Ил Дархан үп бу сүрүн докумуона олус уустук усулуобуйаҕа ылылларын бэлиэтээтэ. Парламеҥҥа уонна туһааннаах кэмитиэттэргэ үлэлэрин иһин махталын биллэрдэ, чуолаан Юрий Николаев салайааччылаах бүддьүөт, үп, нолуок уонна сыана бэлиитикэтин, баай-дуол, приватизация кэмитиэтин ураты кылаатын тоһоҕолоото.
Дьокутааттар соторутааҕыта өрөспүүбүлүкэ бырабыыталыстыбатын уонна тустаах министиэристибэлэр, биэдэмистибэлэр салайааччыларын кытта эрэгийиэн үпкэ-харчыга бэлиитикэтин чугастааҕы кэмҥэ быһаарар сүрүн сокуоннар барылларын көрдүлэр. Хамыыһыйалар мунньахтарыгар чугастааҕы үс сылга өрөспүүбүлүкэ бүддьүөтүн туһунан сокуон бырайыагар 700-тэн тахса уларытыы көрүлүннэ. Уопсайа 28 млрд солкуобай суумалаах федеральнай бүддьүөт эбии дохуотун үллэриигэ, ону тэҥэ дьокутааттар киллэрбит 270-ча көннөрүүлэригэр ураты болҕомто уурулунна.
Уопсай ороскуот 2026 сылга 345 млрд 347 мөл. солк. ылар. Бу уопсай ороскуоттан аҥара үгэс быһыытынан социальнай салааларга, ол иһигэр доруобуйа харыстабылыгар, үөрэхтээһиҥҥэ уонна социальнай көмүскэлгэ ыытыллара былааннанар.
Айсен Николаев парламентарийдары кытта көрсүһүүтүгэр хомунаалынай хаһаайыстыба тэрилтэлэригэр субсидияны биэриигэ тохтоото. Кэпсэтии түмүгүнэн, бүддьүөт бырайыагар бу сыалга 45 млрд кэриҥэ солкуобай көрүлүннэ, ол уопсай ороскуот сэттэ гыммыт биирин ылар.
Мунньах кыттыылаахтара агропромышленнай комплекс үбүлээһинин туһунан эмиэ кэпсэттилэр. Өрөспүүбүлүкэ баһылыга тыа хаһаайыстыбатыгар ороскуоту кырата былырыыҥҥы таһымҥа тутар наадалааҕын тоһоҕолоото. Ону тэҥэ авиациянынан көтүү туһунан эмиэ кэпсэттилэр.
“2026 сыллааҕы уонна былааннаммыт 2027–2028 сылларга Саха Өрөспүүбүлүкэтин судаарыстыбаннай бүддьүөтүн туһунан” сокуон барылын сэтинньи 26-27 күннэригэр Ил Түмэн уон бэһис пленарнай сиэссийэтигэр көрүөхтэрэ, диэн иһитиннэрэр Ил Дархан, бырабыыталыстыба пресс-сулууспата.
Киин куоракка түүҥҥү кулууптарга буруйу оҥоруу, охсуһуу нэдиэлэ ахсын кэриэтэ тахса турар. Ааспыт сыл ахсынньы…
Саха таҥаһын үрдүк таһымҥа таһаарбыт биллэр худуоһунньук, модельер-дизайнер, педагог Августина Филиппова аатын улахан алмааска иҥэрдилэр.…
Оҕо быраабын туһунан ийэ үҥсүүтүн кэнниттэн Өлүөхүмэ улууһун борокуратуурата бэрэбиэркэ ыытта. Өлүөхүмэ куоракка 16 саастаах…
Анал байыаннай дьайыы бэтэрээнэ Атаджан Акиев эйэлээх олоххо эргиллэн кэлэн, Уус Маайа улууһун балыыһатыгар үлэтин…
“МАХ мессенджергэ контены тохтуу түһэн баран таһаарары былаанныыр кыахтаннылар, оттон сурутааччылар – иһитиннэриилэрин эрдэттэн ыйбыт…
Олунньу 2 күнүттэн Саха сиригэр бырабыыталыстыба отчуота үгэс быһыытынан, сирэй көрсөн ыытыллыаҕа. Көһө сылдьар мунньахтарга …