Ил Дархан Айсен Николаев Оһуохай күнүнэн эҕэрдэлиир

Ытыктабыллаах Саха сирин олохтоохторо! Эһигини Оһуохай күнүнэн ис сүрэхпиттэн эҕэрдэлиибин!

Бу бырааһынньык биһиэхэ дьоһун суолталаах, тоҕо диэтэххэ култуурабыт уонна төрүт үгэспит өрөспүүбүлүкэбитин ураты тыынныыр уонна бөҕөргөтөр. Биһиги Олоҥхобут дойдутугар тапталбытын, үгүс үйэлэри уҥуордаан кэлбит устуоруйабытынан киэн туттуубутун оһуохай үҥкүүтүнэн кэрэһилиибит.  Арассыыйа Федерациятын Бэрэсидьиэнэ Владимир Владимирович Путин култуура эгэлгэтэ уонна араас норуоттар алтыһыылара Арассыыйа уопсастыбатын дэгиттэр сайдыытыгар сүдү суолталааҕын элбэхтэ бэлиэтээн эппитэ. Итиэннэ 2022 сыллаахха Арассыыйа норуоттарын тылынан уонна өйүнэн айбыт култуураларын үйэлээх баайын кэрискэтигэр оһуохайы киллэрии Саха сирин норуоттарыгар сүҥкэн суолталааҕа саарбаҕа суох.

Өрөспүүбүлүкэҕэ норуоттар үгэстэрин чөл хаалларар уонна сайыннарар көхтөөх үлэ ыытыллар. Ол курдук, Оһуохай үҥкүүтүн чөл хаалларар уонна сайыннарар кэлим былаан ылыллыбыта, оһуохайы таһаарааччылар айар мастарыскыайдара тэриллибиттэрэ, талааннаах оһуохайдьыттарга истипиэндьийэ бырагыраамалара олохтоннулар, сыыппара ресурсата ырытыллан оҥоһуллар, научнай үлэлэр бэчээккэ тахсаллар, Саха сирин эдэр көлүөнэ олохтоохторугар норуот үҥкүүтүгэр тапталы иҥэрэр, билиини кэҥэтэр кыаҕы биэрэр бэстибээллэр уонна куонкурустар тэриллэллэр. 2025 сылга оһуохай үҥкүүтэ үгэс быһыытынан толоруллар түһүлгэлэрин хабар култуурунай-туристическай маршруттары торумнааһын саҕаланна, ону таһынан өрөспүүбүлүкэ улуустарын сирдэригэр-уоттарыгар «Түөлбэ оһуохайа» диэн экспедициялар тэриллиэхтэрэ.

Быйылгы бырааһынньыкпытын уһулуччулаах оһуохайдьыт, олоҥхоһут, ырыаһыт, уран тыл маастара, саха норуотун үҥкүүтүн култууратын төрүттээччи Сергей Афанасьевич Зверев – Кыыл Уола төрөөбүтэ 125 сылыгар аныыбыт.

Бүгүн «Куйаар далай түһүлгэ» өрөспүүбүлүкэтээҕи оһуохайдьыт ыччат куонкуруһун лауреаттара биллэриллиэхтэрэ. Кыайыылаахтарга «Евразия норуоттарын оонньуулара – Ердынскай оонньуулар» норуоттар икки ардыларынааҕы этнокултуурунай бэстибээлгэ путевкалар туттарыллыахтара. Оһуохай сүдү суолтата дойдубутугар кытаанах тургутуулар уонна кыайыылар кэмнэригэр дьэҥкэтик көстөр.

Саха сирин саллааттара фроҥҥа баралларыгар төрөөбүт дойдуларыгар оһуохайдыыр үгэстээхтэрэ. Аҕа дойду Улуу сэриитин сылларыгар оннук этэ, анал байыаннай дьайыы ыытыллар кэмигэр даҕаны бу үгэс салҕанан барар. 1945 сыллаахха ыытыллыбыт Кыайыы оһуохайа бар дьон өйүгэр-санаатыгар өрүү тыыннаах, ол курдук Улуу Кыайыы күнүгэр оһуохай түһүлгэтэ билигин да тэриллэр.

Доҕордоһуу, сомоҕолоһуу күүһүн иҥэрбит оһуохайбыт Сахабыт сирин бары норуоттарын уонна бары көлүөнэлэрин түмэр.

Бүгүҥҥү күҥҥэ барыгытыгар үтүөнү, чэгиэн туругу, дьиэ кэргэҥҥэ сылаас сыһыаны, дойдубутун уонна өрөспүүбүлүкэбитин сайыннарар туһугар саҥа ситиһиилэри баҕарабын!

Саха Өрөспүүбүлүкэтин Ил Дархана Николаев А.С.