Ил Дархан Айсен Николаев пресс-кэмпириэнсийэтэ саҕаланна

Бүгүн, ахсынньы 26 күнүгэр, Дьокуускайга Кадеттар оскуола-интэринээттэригэр 11 чаастан Ил Дархан 2024 сылы түмүктүүр, кэлэр сыл былааннарын билиһиннэрэр пресс-кэмпириэнсийэтэ саҕаланна.

Пресс-кэмпириэнсийэҕэ өрөспүүбүлүкэ изданиетын суруналыыстара, ону тэҥэ военкордар ыйытыыларын бэлэмнээн, ох курдук оҥостон кэлбиттэр. Ил Дархан суруналыыстары кытта көрсөрүттэн үөрэрин биллэрдэ. Кэлэр сылы Ил Дархан туһаайан этиитигэр Ийэ дойдуну көмүскээччи сылынан биллэрбитэ.

Онон байыаннай дьайыы кыттыылаахтарыгар, дьиэ кэргэннэригэр туох көмө салгыы оҥоһуллуоҕун, шефтээх эрэгийиэннэргэ туох үлэ барыаҕын туһунан бастакы ыйытыыны Саха сирэ сүрүн редактора, военкор Александр Тарасов биэрдэ.

«Биһиги бу сылларга олус үчүгэй гуманитарнай көмөнү оҥорор систиэмэни, тирэх пууннары тэрийбит эрэгийиэннэртэн биирдэстэрэ буолабыт. Юрий Трутнев көмөтүнэн квадроциклы, мотоциклы уонна да араас тиэхиньикэни илдьэбит. «Вместе к победе» штаб тэриллэн үлэлиир, волонтердар үлэлэрэ олус көмөлөөх, кинилэргэ махталбын тиэрдэбин. Байыастарга, дьиэ кэргэннэригэр социальнай көмө оҥоһуллар. Саҥа эрэгийиэннэргэ быйыл 65 эбийиэги өрөмүөннээтибит, эһиил 11 улахан эбийиэги өрөмүөннүөхпүт, — диэн Айсен Николаев хоруйдаата.