Ил Дархан Айсен Николаев «Россия 24» телеханаалга санаатын үллэһиннэ

Бүгүн, балаҕан ыйын 5 күнүгэр, Владивостокка Илиҥҥи экэнэмиичэскэй пуорум өрө көтөҕүллүүлээхтик, сэргэхтик ыытылынна.

Суолталаах тэрээһин туһунан Ил Дархан Айсен Николаев «Россия 24» дойду киин телеханаалыгар бэйэтин санаатын үллэһиннэ.

— Илиҥҥи экэнэмиичэскэй пуорумҥа РФ Бэрэсидьиэнэ Владимир Путин кэккэ суолталаах сорудахтары биэрдэ. Ол курдук, 2027 сылтан Уһук Илин эрэгийиэнэ барыта Урутаан сайдыы территориятынан буолуоҕа диэтэ. Аны Уһук Илиҥҥи ипотеканы иккис ырыынакка туһанары, элбэх оҕолоох дьиэ кэргэттэргэ, учууталларга эрэ буолбакка, үөрэхтээһин бары үлэһиттэригэр эмиэ көҥүллүүргэ, Дьокуускайга үрдүк үөрэх кыһаларын кампустарын тэрийии курдук сорудахтары чугастааҕы кэмҥэ толорорго туһаайан эттэ.

Саха сирэ быйылгы пуорумҥа 100 млрд суумалаах 30 сөбүлэҥи түһэристэ. Бу — өр сылларга барар бииргэ үлэлээһин докумуоннара. Саха сирэ сайдыытыгар, инники кэскилигэр туһуламмыт тосхоллору олоххо киллэрэргэ дьулуһуохпут, — диэн бэлиэтээтэ Айсен Николаев.