Хаартыскаҕа Мария Васильева түһэриитэ, СИА
Айсен Николаев «Настаабынньыктааһын бастыҥ быраактыката – 2024» өрөспүүбүлүкэтээҕи куонкурус кыайыылаахтарын эҕэрдэлээтэ.
Ил Дархан ыччаты профессиональнай сайыннарыыга уонна үлэ көдьүүһүн үрдэтиигэ бырайыактардаах түөрт бастыҥ настаабынньыкка наҕараадалары туттарда.
Өрөспүүбүлүкэ салайааччыта Саха сиригэр настаабынньыктааһыны салгыы сайыннарар наадатын, эдэр көлүөнэни сайыннарыыга уһуйааччылар оруолларын тоһоҕолоон бэлиэтээтэ.
«Эһигини ис сүрэхпиттэн кыайыыгытынан эҕэрдэлиибин. Хас биирдиигитигэр үтүө суобастаах үлэҕит, бэйэҕит дьыалаҕытыгар ытыктабылгыт, үрдүк маастарыстыбаҕыт иһин махтанабын. Настаабынньыктааһын — бу улахан эппиэтинэс. Өрөспүүбүлүкэ тэрилтэлэригэр уһуйааччылары сыал-сорук туруоран сайыннарар улахан суолталаах. Эдэр үлэһиттэргэ уһуйааччы — дьоһун суолталаах уонна улахан оруоллаах. Эһиги болҕомтоҕутунан кини түргэнник үүнэр, сайдар, үөрүйэхтэнэр», — диэтэ Айсен Николаев.
«Профессиональное развитие молодежи» номинацияҕа кыайыылааҕынан Дьокуускайдааҕы килиэби астыыр кэмбинээт үлэһитэ Татьяна Пшенникова буолла. Кини салайар кондитерскай сыаҕар настаабынньыктааһын бырагырааматын киллэрбит.
«Биһиэхэ, уһуйааччыларга, бу куонкурус — үлэбитин көрүү, эдэр исписэлиистэргэ үөрүйэхпитин, сатабылбытын, билиибитин-көрүүбүтүн биэриигэ, иҥэриигэ итэҕэлбитин билинии, сыаналааһын. Улахан махталбын бары өйөөбүт, тирэх буолбут дьоммор, ыччакка тиэрдэбин. Кинилэрэ суох бу кыайыы кыаллыа суоҕа этэ. Кинилэр умсугуйан үөрэниилэрэ, сайдыыга, билиигэ-көрүүгэ баҕалара улахана, сырдыкка-кэрэҕэ тардыһыылара биһигини кынаттыыр. Эһиги ситиһиигитинэн биһиги киэн туттабыт. Эдэрдэр үлэлэригэр-хамнастарыгар ситиһиилэнэ туралларыгар эрэнэбит», — диэн этэр Дьокуускайдааҕы килиэп кэмбинээтин кондитерскай сыаҕын начаалынньыга Татьяна Пшенникова.
Ону таһынан, «Лучшие практики наставничества по повышению производительности труда» номинацияҕа бастыҥнарынан С.Ф.Гоголев аатынан Дьокуускайдааҕы педагогическай кэллиэс дириэктэрэ Изольда Николаева, «Берегиня» дьиэ кэргэҥҥэ оҕону иитиигэ көмөлөһөр киинтэн Наталия Захарова уонна АЛРОСА персоналы салайар сулууспа начаалынньыга Антон Потах ааттаннылар.
Күөн күрэскэ барыта 9 тэрилтэ кыттыбыт. Күөн күрэс «Производительность труда» национальнай бырайыак иитинэн Саха сиригэр төрдүс төгүлүн ыытыллар. Куонкурус уһуйааччылар (настаабынньыктар) ситиһиилэрин уонна талааннарын көҕүлүүргэ, биһирииргэ, үөрүйэхтэрин салгыы тарҕатарга көмөлөһөр.
«Производительность труда» национальнай бырайыак РФ Бэрэсидьиэнэ Владимир Путин 2018 с. ыйааҕынан бигэргэтиллибитэ уонна дойдуга сыл аайы үлэ-хамнас үүнүүтүн-сайдыытын усулуобуйатын тэрийэргэ туһаайыллар.
СӨ Ил Дарханын уонна Бырабыыталыстыбатын пресс-сулууспата
Хаартыскаҕа Мария Васильева түһэриитэ, СИА
Оҕуруот аһын сыаната мантан күһүн өссө түһүөҕэ. Билигин помидор сыаната киилэтигэр 15-200 солкуобайга халбаҥныыр, кабачок…
«Национальнай Лотерея» «Мечталлион» лотерея 154-с тираһын Саха сириттэн кыайыылааҕын көрдүүр. Кыайыылаах биир мөлүйүөн солкуобайы сүүйбүт…
Бастакы кылааска киирэн баран, оҕо уутун хаммат, начаас сылайар, уруок ааҕыан баҕарбат буоллаҕына, оҕону ыгар-түүрэр…
Илиҥҥи экэнэмиичэскэй пуорум «Уһук Илин сайдыытын күүһэ – үөрэхтээһин» диэн сессиятыгар СӨ Бэрэссэдээтэлин солбуйааччыта Анатолий…
Быйыл саахсаланан ыал буолбуттар, 50 эбэтэр онтон элбэх сыл олорбут Арассыыйа дьиэ кэргэттэрэ, эрэгийиэн таһымыгар…
Саха сиригэр биллэр уопсастыбанньык, адаптивнай күрэсчит, 1 группалаах инбэлиит, диализтаах уонна уорганнарын көһөртөрбүт ыарыһахтар уопсастыбаларын…