Күндү Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини кэлэн иһэр 2023 сылынан ис сүрэхпиттэн итиитик-истиҥник эҕэрдэлиибин!
Саҥа үтүө саҕалааһыннары түстүүр күүтүүлээх күммүт чугаһаата. Бу кэмҥэ үгэс быһыытынан түмүк оҥоһуллар. Биһиги, бастатан туран, ааһан эрэр 2022 сылга дойдубут кэскиллээх, көҥүл уонна тутулуга суох буоларын туһугар бары бүттүүн биир сомоҕо буолбуппутун өйдүү-саныы сылдьыахпыт.
Саха сирин олохтоохторо, элбэх омуктаах Арассыыйа бар дьонун кытта бииргэ, Аҕа дойдубут көмүскэлигэр турунан, буойун ытык иэһин толороллор, булгуруйбат санааларын, хорсуннарын көрдөрөллөр. Анал байыаннай дьайыы кыттыылаахтарын, хомуурга уонна баҕа өттүнэн барбыттары, кинилэр дьиэ кэргэттэрин бүтүн өрөспүүбүлүкэ өйүүр. Саха сирин олохтоохторо ис сүрэхпититтэн кыайыыга бэйэбит кылааппытын киллэрэргэ дьулуһабыт. Бары тургутуулары чиэстээхтик туораан, эбии күүһүрэн, кыаҕыран иһиэхпит диэн эрэнэбит.
Ааспыт сылга Саха АССР төрүттэммитэ 100 сылын бэлиэтээтибит. Төһө да уустуктар баалларын үрдүнэн, үөрүүнү үксэтэр үтүө дьыалалар, айымньылаах былааннар олоххо киирдилэр.
Федеральнай уокурукка экэниэмикэ үүнүүтүн муҥутуур үрдүк көрдөрүүлэрин ситистибит. Ол курдук, 2022 сылга эрэгийиэннээҕи баалабай бородуукта 8% үрдээтэ. Чоҕу, ньиэби, гааһы уонна кыһыл көмүһү хостооһуҥҥа төрдүс төгүлүн бастыҥ көрдөрүүлэри тупсардыбыт.
Элбэх омуктаах өрөспүүбүлүкэбит төрүттэммитэ 100 сылын туолар кэрэ бэлиэ сыла Ийэ сылынан биллэриллибитэ кэрэхсэбиллээх. Бигэ тирэхтээх улахан дьиэ кэргэн уонна оҕоҕо таптал инникитин даҕаны биһиги тутаах сорукпутунан буолуоҕа. Ааспыт сылга Саха сирэ оҕо төрөөһүнүнэн уонна нэһилиэнньэ олоҕун уһунунан Уһук Илиҥҥэ эмиэ бастыҥ көрдөрүүлэннэ.
Үүнэн иһэр 2023 сыл биһиэхэ үтүө уларыйыылары, улахан ситиһиилэри тосхойуо, таһаарыылаах буолуо, хоту сир олохтоохторугар саҥа кыахтары үөскэтиэ диэн эрэнэбин! Арассыыйаҕа Педагог уонна настаабынньык сылыгар, Саха сиригэр Үлэ сылыгар күүспүтүн, эрчиммитин эбэн, билиибитин, үөрүйэхтэрбитин түмэн, араас көлүөнэлэр дьулуурдарын уонна мындыр өйдөрүн холбоон, ыччаппытын айымньылаахтык үлэлииргэ, Ийэ дойдуну таптыырга уһуйуохпут, төрөөбүт Сахабыт сирин уонна Улуу Арассыыйа туһугар үөрэниэхпит, үлэлиэхпит, айыахпыт-тутуохпут!
2023 сылы биһиги Арассыыйа саҥа эрэгийиэннэрин – Донецкай уонна Луганскай норуодунай өрөспүүбүлүкэлэри, Запорожье уонна Херсон уобаластарын кытта бииргэ бэлиэтиэхпит. Модун кыахтаах, үтүө тыыннаах-айылгылаах дойдубутугар эйэ уонна өйдөһүү баар буоллун!
Күндү доҕоттор! Эһиэхэ чэгиэн-чэбдик туругу, уйгулаах олоҕу, ыра санааҕыт туолуутун, табыллыыны, дьолу-соргуну, үөрүүнү-көтүүнү баҕарабын! Бэйэҕитин уонна чугас дьоҥҥутун харыстааҥ! Бу алыптаах бырааһынньык аптаах эйгэтэ биһиэхэ барыбытыгар умнуллубат кэрэ түгэннэри бэлэхтээн аастын! Дьоллоох Саҥа дьылы уонна Ороһуоспаны! Саҥа сылынан, саҥа дьолунан, Саха сирин ытык-мааны дьоно-сэргэтэ!
Саха Өрөспүүбүлүкэтин Ил Дархана Айсен Николаев
Арассыыйа Сэлиэстийэлиир кэмитиэтин Саха сиринээҕи салаатын Дьааҥы оройуоннар икки ардыларынааҕы силиэстийэлиир отделынан 45 саастаах эр…
«Черскэй бөһүөлэгин баһылыгын дуоһунаһыгар анал байыаннай дьайыыга кыттыбыт икки дьоһуннаах хандьыдаат туруоруммуттара. Быыбар кыайыылааҕынан Петр…
Саха сиригэр «яконтракт14.рф» саҥа саайт нөҥүө хантараагынан байыаннай сулууспаҕа барааччылар сайаапка хаалларыахтарын сөп. Российскай Федерация…
Саха Өрөспүүбүлүкэтин Ил Дархана Айсен Николаев «Быһа лииньийэтигэр» ыытыллыбыт сылларыгар олохтоохтортон 10 тыһыынчаттан тахса ыйытыы…
Сайын устата кыстыкка бэлэмнэнии араас хайысхалаахтык ыытыллан, оттук сезона саҕаланна. Биллэн турар, барыта эриэ-дэхси буолбатах…
Мэҥэ Хаҥалас улууһун Судаарыстыбаннай автоинспекциятын отделениета иһитиннэрбитинэн, бэҕэһээ, балаҕан ыйын 18 күнүгэр 9 чаас 30…