Ил Дархан Айсен Николаев сэтинньи ый түмүктэрин туһунан

Бүгүн өрөспүүбүлүкэ Ил Дархана Айсен Николаев быһа эпииргэ тахсан, сэтинньи ый түмүктэрин кэпсээтэ.

Ол курдук, сэтинньи ыйга федеральнай, норуоттар икки ардыларынааҕы таһымнаах улахан тэрээһиннэр ыытыллыбыттар. Үс федеральнай миниистир кэлэн, дьоһун суолталаах боппуруостары быһаарбыттар. Уһук Илиҥҥэ бастакы «Үлэ кыбартаала» арыллыытыгар Арктика сайдыытын миниистирэ Алексей Чекунков уонна Юрий Трутнев көмөлөспүттэрин бэлиэтээтэ. Бу кэпсэтиилэр кэмнэригэр биһиги ньиэп баазаларбытын саҥардан оҥорууну быһаарыстылар. Аны туран «Цифровой алмаз»пуорум ыытыллыыта эмиэ улахан суолталаммыт.
Өрөспүүбүлүкэ үбүн-харчытын сүрүн докумуона — бүддьүөт ылыныллыбыт. Онно тыа хаһаайыстыбатыгар үгүөрү үп көрүллүбүт — 14 млрд солкуобай. Тэрээһиннээх хаһаайыстыбаларга үүтү туттарыы биир киилэтин 60 солк тутуохтара, сылгыга, табаҕа эмиэ. Ону таһынан, онкология киинин тутуу 2023 сылга түмүктэниэхтээх. Бүддьүөт социальнай аналын ыһыктыбат.
Дойду бэрэсидьиэнэ Владимир Путин быстах хомуурга сылдьар дьон ийэлэрин кытта көрсүһүүтүн туһунан ахтарыгар Айсен Николаев онно көрсүһүүгэ кыттыбыт Марина Константиновна Бахилинаҕа уонна Саха сирин бары ийэлэригэр дьиҥнээх патриоттары иитэн таһаарбыттарын иһин махтанна. Уонна бэрэсидьиэн эрэгийиэннэргэ былаастар бу байыастар дьиэ кэргэттэригэр көмөнү оҥоруулара күүһүрүөхтээҕин ыйбыта. Ол соругу Саха сирэ толорор. Ол курдук, быстах хомуурга кыттааччылар оҕолорун дьыссаатынан хааччыйбыттар (700  оҕо), орто анал үөрэх 100 устудьуонугар, үрдүк үөрэх 60 устудьуонугар истипиэндьийэ төлөнөр, оскуола оҕолорун сылаас аһынан хааччыйаллар. Боппуруостары ситэри быһаараллар. Айсен Сергеевич бу тиэмэҕэ салгыы бу үлэни сүрүннүүр киин үлэтин туһунан кэпсээтэ. Тустаах киин бааһырбыт-эчэйбит байыас ханна эмтэнэ киирбитин чопчулуур, материальнай-тэхиньиичэскэй өттүнэн хааччыйыыга болҕомто ууруллубут. Ил Дархан этэринэн, байыаннай чаастар салайааччыларын кытта ыкса сибээс олохтонор. Саха сирин быраастарын Кировскайга командировкаларын астынан туран бэлиэтээтэ. 2500 киһиэхэ консультация оҥорбуттар, олох үлэлээбэккэ турбут рентген аппарааттарын үлэлэппиттэр, эпэрээссийэлээбиттэр. Онон саха быраастарын туһунан Донецкай, Луганскай өрөспүүбүлүкэлэргэ махтана уонна сөҕө кэпсээбиттэр.
Айсен Николаев Дьокуускай куорат «Килбиэннээх үлэ куората» ааты ылбытынан киэн тутунна. Бу боппуруоһу бэрэсидьиэҥҥэ туруорсубутун аҕынна. Өйдөбүнньүк стела Алдаҥҥа уонна Дьокуускайга тутулларыгар баҕа санаатын тириэртэ.
Сэтинньи ыйга Саха сирин бастакы бэрэсидьиэнэ Михаил Ефимович Николаев 85 сааһын бэлиэтээбиппит. Кининэн киэн туттарын, махтанарын биллэрэн туран, ытык киһибитигэр чэгиэн доруобуйаны баҕарда.
Ити курдук, сэтинньи ыйга Саха сирин олоҕор-дьаһаҕар буолбут бэлиэ түгэннэри, суолталаах боппуруостары Ил Дархан Айсен Сергеевич аҕынна уонна чорботон бэлиэтээтэ.