Ил Дархан Айсен Николаев Суол федеральнай ааҕыныстыбатын салайааччытын кытары көрүстэ

Ил Дархан Айсен Николаев Москваҕа оробуочай сырыытын кэмигэр  «Бүлүү» уонна «Халыма» федеральнай суоллары салгыы  эксплуатациялааһын тула  Суол федеральнай ааҕыныстыбатын салайааччыта  Роман  Новиковы кытта кэпсэттэ.

Кэлиҥҥи сылларга федеральнай таһымнаах суоллар быста мөлтөх  туруктарынан үҥсүү киириитэ элбээтэ. Дьиҥэр, саҥа учаастактары аспааллааһын үлэтэ ыытыллар. Ол эрээри айан-сырыы элбээн итиэннэ ыарахан уйуктаах массыыналар сырыылара үксээн, суол алдьаныыта, кээһэниитэ тахса турар. Сорох  учаастактарга ардах күүскэ түстэҕинэ, массыыналаахтар  харгыстары көрсөллөр. Билигин ордук уустук балаһыанньа «Халыма» суолга Чурапчы сэлиэнньэтиттэн Томпо оройуонугар Алдан өрүскэ диэри үөскээтэ.

Онон, үөскээбит быһыыны-майгыны быһаарар туһуттан, салайааччылар  суолу көрүүгэ-истиигэ үбүлээһин кээмэйин улаатыннарарга, маны таһынан сыыйа түһүмэҕинэн  ыйааһын хонтуоруолун киллэриини, матырыйаал саппааһын улаатыннарарга кэпсэттилэр.