Ил Дархан Айсен Николаев Табаһыт күнүнэн эҕэрдэлиир

Ытыктабыллаах табаһыттар уонна хоту дойду олохтоохторо! Саха Өрөспүүбүлүкэтин салалтатын уонна тус бэйэм ааппыттан Табаһыттар күнүнэн эҕэрдэлиибин!

Быйыл номнуо бэһис төгүлүн – 2021 сылтан — Саха сиригэр бу ураты бырааһынньык бэлиэтэнэр. Бүгүн хотугу сир төрүт олохтоох аҕыйах ахсааннаах норуоттарыгар, табаһыттарга, олохторугар-дьаһахтарыгар төрүт үгэстэрин харыстааччыларга сүгүрүйэбит.

Үйэлэр тухары табаһыттар Арктика туундаратын киэҥ нэлэмэн сирдэринэн уонна өрөспүүбүлүкэ соҕуруу хайалаах уонна өрүстээх сирдэринэн табаларын үөрдэрин кытта көһө сылдьаллар.

Саха сирин табаһыттара — өбүгэлэрбит хас эмэ үйэ төрүт дьарыктарын салҕааччылара буолаллар. Саха сиригэр табаны иитиинэн 20 оройуоҥҥа дьарыктаналлар. Бу хаһаайыстыбаларынан 1200-тэн тахса дьон кыһамньылаахтык үлэлиир. Өрөспүүбүлүкэ таба ахсаанынан дойду үрдүнэн лидердэр ахсааннарыгар киирсэр. Билигин Саха сиригэр 114-тэн тахса табалаах хаһаайыстыба баар. 2025 сылга биһиги иннибитигэр 175 тыһыынчаҕа диэри таба ахсаанын элбэтии сүдү соруга турар.

Биһиги экстремальнай килиимэт усулуобуйатыгар төрүт үгэстэригэр олоҕуран аан дойду цивилизациятын уһулуччулаах сайдыытыгар табаны тыыннаахтыы иитии дьарыгын харыстыыбыт.
Саха сирин бүддьүөтүттэн баазаны, харааллары уонна күрүөнү-хаһааны тутууга, табаны атыылаһыыга уонна тиэйэн таһыыга, таба миграциятын суолларыгар маршрутнай дьиэлэри тутууга, табаһыттар кыһалҕаларыгар вездеходтары уонна снегоходтары атыылаһыыга субсидия көрүллэр.

Саха сиригэр эдэр исписэлиистэри тардыыга «Эдэр табаһыт» бырагыраама үлэлиир. Таба иитиитигэр түөрт сылтан итэҕэһэ суох үлэлээбит эдэр дьон Арктикаҕа олорор дьиэни атыылаһыыга эбэтэр тутууга 2 мөлүйүөн солкуобайы ылыахтарын сөп. 2024 сыллаахха үбү-харчыны Анаабыр, Булуҥ, Эдьигээн, Муома, Кэбээйи, Томпо, Усуйаана, Эбээн Бытантай уонна Өлүөхүмэ оройуоннарын эдэр табаһыттара ылбыттара. Бу бырагыраама Арктика олохтоохторугар көдьүүстээҕин көрдөрдө.

Алаһа дьиэ хаһаайкатыгар, чуум үлэһитигэр, махталбын тиэрдиэхпин баҕарабын. Бастакы, сылаас уонна кыһамньылаах уопуту табаһыттар оҕолоро эһигиттэн ылаллар. Чуолаан эһиги кинилэри хоту дойду дьиҥнээх хаһаайыттара, айылҕа оҕолоро буола үүннэрэҕит!

Күндү табаһыттар!

Төрөөбүт дойдугутугар, күннээҕи дьаныардаах үлэҕитигэр, үтүө үгэстэргэ, тапталлаах дьыалаҕа бэриниилээххитигэр махтанабын! Кытаанах доруобуйаны, ситиһиилэри, дьолу- соргуну баҕарабын!

Ил Дархан Айсен Николаев