Ил Дархан Айсен Николаев Уһук Илиҥҥи федеральнай уокурук сэбиэтин мунньаҕар кытынна

Ил Дархан Айсен Николаев Уһук Илиҥҥи федеральнай уокурук сэбиэтин мунньаҕар кытынна. Мунньаҕы РФ барыбаатыластыбатын бэрэссэдээтэлин солбуйааччы — РФ бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев салайан ыытта. Манна оттук сезонугар бэлэмнэнии туһунан кэпсэттилэр диэн СӨ Ил Дарханын уонна бырабыыталыстыбатын дьаһалтатын пресс-сулууспата иһитиннэрэр.

Саха сиригэр күһүҥҥү-кыһыҥҥы кэмҥэ 1165 хочуолунай, 4163 км ититии, 1763 км уу уонна 748 км канализация ситимэ, 853 км уоту тиэрдии, 116 дизельнай ыстаансыйа, 2008 социальнай суолталаах эбийиэк, 39 тыһыынчаттан тахса олорор дьиэ бэлэмнэннэ. Уматыгы тиэйии түмүктэннэ.  Муниципальнай тэриллиилэргэ барыларыгар оттук сезона саҕаланна.

«Мунньахха электроэнергетика, ОДьКХ, социальнай суолталаах эбийиэктэр бэлэмнэрин туһунан кэккэ боппуруостар көрүлүннүлэр. Бу Уһук Илин сайдыытын хааччыйыыга уонна дьон олоҕун хаачыстыбатыгар олус суолталаахтар. Бу быһаарыллара инникини түстүүр», — диэн Ил Дархан эттэ.