Ил Дархан Айсен Николаев «Универсальнай университет» дириэктэрэ Афанасий Саввины кытта көрүстэ

СӨ Ил Дархана Айсен Николаев уонна «Универсальнай университет» (Universal University) АН үрдүк үөрэх тэрилтэтин дириэктэрэ Афанасий Саввин кытта оробуочай көрсүһүүлэригэр өрөспүүбүлүкэ айар-тутар кыаҕын сайыннарыы боппуруостарын дьүүллэстилэр.

Ил Дархан Афанасий Саввиҥҥа Саха сирин сайдыытын Корпорациятын генеральнай дириэктэрин дуоһунаһыгар таһаарыылаах үлэтин иһин махтанна уонна дойду биир саамай бөдөҥ уонна түргэнник сайда турар айар-тутар үрдүк үөрэҕин кыһатыгар саҥа саҕалааһыннарыгар ситиһиилэри баҕарда.

Айсен Николаев этэринэн, Афанасий Саввин салайыытынан корпорация эрэгийиэн саҥаны киллэрэр уонна айар-тутар сайдыытын экосистиэмэтин сүрүн сорҕото буолла.

«Үлэ кыбартаала» кластер курдук бөдөҥ бырайыактар олоххо киирбиттэрин түмүгэр, өрөспүүбүлүкэ дойдуга айар индустриялары сайыннарыыга биир бастыҥ буолла. Афанасий Саввин үөрэх кыһатын сайдыытын, эрэгийиэннэр уонна дойду айар-тутар кыахтарын олоххо киллэрэргэ ирдэниллэр каадырдары бэлэмнээһиҥҥэ үөрэх хайысхаларын былааннарын туһунан кэпсээтэ.

«Бүгүн университет иннигэр суолталаах уонна үгүс өттүгэр стратегическай сорук турар – Арассыыйаҕа үөрэхтээһин уонна айар индустриялар сайдыыларын саҥа моделын оҥоруу. Ол Аан дойду таһымнаах исписэлиистэри – трендэри түстүүр, аан дойдутааҕы хампаанньалары тэрийэр, кэлэр кэм култуурунай кодтарын үөскэтэр уонна бэйэлэрин айар үлэлэрин нөҥүө дойду уонна аан дойду сайдыытыгар дьайар кыахтаах дьону бэлэмниир кыаҕы биэриэ», — диэн Ил Дархан  бэлиэтээтэ.

«Универсальнай университет» (Universal University) – айар-тутар индустриялар киэҥ хайысхаларынан: дизайнтан уонна муусукаттан саҕалаан архитектураҕа уонна урбанистикаҕа тиийэ – үрдүк үөрэх бырагыраамаларын олоххо киллэрэр дойду биир саамай бөдөҥ үрдүк үөрэҕин кыһата буолар.