Хаартыска: https://sakha.gov.ru ылылынна
Күндү Сахам сирин олохтоохторо!
Ытыктабыллаах ыалдьыттар!
Саха Өрөспүүбүлүкэтин салалтатын уонна тус бэйэм ааппыттан Үрүҥ Тунах Ыһыаҕынан эҕэрдэлиибин!
Ыһыах – айылҕа уһуктуутун, өбүгэлэрбит үгэстэрин түстүүр саха норуотугар ураты суолталаах бырааһынньык. Ыһыах сылаас, сырдык, доҕордоһуу уонна сомоҕолоһуу бырааһынньыга.
Араас норуоттар култууралара уонна үгэстэрэ дойдубут туохха да тэҥнэммэт сүҥкэн нэһилиэстибэтэ диэн Россия Федерациятын Президенэ Владимир Владимирович Путин бэлиэтээн эппитэ. Саха сирин олохтоохторо төрөөбүт дойдубут баай устуоруйатыгар, духуобунай нэһилиэстибэтигэр ытыктабыллаахтык сыһыаннаһабыт. Норуоппут сүрүн национальнай бырааһынньыгар Хоту дойду кэрэтин уонна уратытын көрдөрөбүт.
Ыһыах норуот үгэһин илдьэ сылдьар, чөл хаалларар, харыстыыр эрэ буолбакка, бу үгэстэри тарҕатар аналлаах. Быйыл дойдубут уонна Аан дойду устуоруйатыгар сүдү суолталаах Улуу Кыайыы 80 сылын бэлиэтээтибит. 1944 сыллаахха сэрии сут дьылларыгар өрөспүүбүлүкэ салалтата Ыһыах ыһыыны чөлүгэр түһэрэр туһунан суолталаах быһаарыыны ылыммыта. Ол сыл 100 тыһыынчаттан тахса киһи кыттан ыһыах өрөспүүбүлүкэ 21 оройуонугар ыытыллыбыта. Бу тэрээһин дьон санаатын бөҕөргөтөн, эйэлээх олоххо эрэл кыымын сахпыта. Саха сирин бүттүүнэ “Барыта фроҥҥа, барыта Кыайыы туһугар!” лозунунан салайтаран үлэлээбитэ, олорбута.
1945 сыллаахха Саха сирэ Кыайыы Ыһыаҕын киэҥ далааһыннаахтык тэрийбитэ! Бу Кыайыы Ыһыаҕын тойуксут Сергей Зверев – Кыыл Уола арыйбыта. Саха сирин бары муннуктарыгар кыайыылаахтар өрөгөйдөрө буолбута. Биһиги көҥүл олоҕу уонна тутулуга суох буолууну түстээбит аҕаларбытынан, эһээлэрбитинэн киэн туттабыт.
Оттон быйыл бэс ыйын 20-21 күннэригэр Сунтаар улууһугар саха омук киэн туттар ырыаһыта, добун тойуксута, үтүөкэн үҥкүүһүтэ Сергей Зверев – Кыыл Уола төрөөбүтэ 125 сылыгар аналлаах өрөспүүбүлүкэтээҕи Ыһыах ыытыллыаҕа. Тэрээһин чаҕылхай түгэннэринэн Сергей Афанасьевич туруорбут “Алгыс”, “Оһуор”, “Ситим”, “Сайылык оҕолоро” үҥкүүлэрэ, “Кыыс Кыыдаан” олоҥхото буолуохтара.
Дьокуускай туонатыгар бэс ыйын 28-29 күннэригэр “Үс Хатыҥ” ытык сиригэр Улуу Кыайыы 80 сылыгар, Россияҕа Аҕа дойдуну көмүскээччи, Саха Сиригэр Ийэ дойдуну көмүскээччи сылларыгар аналлаах Туймаада Ыһыаҕа 28-с төгүлүн өрөспүүбүлүкэбит олохтоохторун үгэс быһыытынан түмэ тардыаҕа. Бу биһиги устуоруйабытынан уонна киэн туттуубутунан буолар.
Онтон Нерюнгри куорат 50-с үбүлүөйдээх сылыгар от ыйын 4-5 күннэригэр өрөспүүбүлүкэтээҕи Олоҥхо Ыһыаҕа ыытыллыаҕа.
Өрөспүүбүлүкэбит араас муннуктарыгар ыытыллар Ыһыах дьоно-сэргэтэ Үөһээ Айыыларга сүгүрүйэр, уйгуну-быйаҥы, эйэни, ситиһиилэри көрдөһөр алгыс сиэрин-туомун толоруохтара. Этиллибит алгыс тыллара хас биирдии дьиэҕэ этэҥҥэ буолууну аҕаллыннар, Аҕа дойдубутун көмүскүүр буойуннарбытыгар кыайыыны түстээтиннэр. Араас кыһалҕаны ааһан, өрөспүүбүлүкэ бүттүүнэ Кыайыы оһуохайын толоруохпут диэн бигэ эрэллээхпин!
Күндү доҕоттор! Ыһыах сырдык күүһэ өрөспүүбүлүкэбит уонна Улуу Россиябыт туһугар үлэлииргэ-хамсыырга, айарга-тутарга көҕүлээтин! Барыгытыгар өҥ-быйаҥ сайыны, таһаарыылаах үлэни, чэгиэн-чэбдик туругу уонна бары үтүөнү баҕарабын! Уруй-туску!
Саха Өрөспүүбүлүкэтин Ил Дархана А. С. Николаев
Дьокуускай куорат полициятын 3-с нүөмэрдээх салаатын учаастактааҕы боломуочунайдара Уус Алдан улууһуттан төрүттээх, урут сууттана сылдьыбыт…
Сахалар төрүт итэҕэлбитинэн, таҥха кэмигэр чуумпутук, сэмэйдик сылдьыахтаахпыт. Ол эрээри, тугу гыныахтаахпытын сиһилии билбэппит. Таҥха…
Бу тэрээһиҥҥэ араас тэрилтэлэр салайааччылара, исписэлиистэрэ уонна анал байыаннай дьайыы кыттыылаахтарын дьиэ кэргэттэрин кыһалҕаларын кытта…
Оскуола саастаах оҕо улахан киһи курдук күҥҥэ үстэ аһыырынан муҥурдаммат. Кини оскуолаҕа сылдьан остолобуойга, чугастыы…
Үөрэҕи уонна билими кэтээн көрөр федеральнай сулууспа иһитиннэрэринэн, оскуоланы бүтэрээччилэр олунньу 1 күнүгэр диэри биир…
Дьокуускайдааҕы полиция 4-с нүөмэрдээх отделын дьуһуурунай чааһыгар биир олохтоох дьахтартан төлөпүөнүн уордарбытын туһунан сайабылыанньа киирбит.…