Айсен Николаевы кытта «Быһа лииньийэҕэ» 10 тыһыынчаттан тахса ыйытыы киирбит

Саха Өрөспүүбүлүкэтин Ил Дархана Айсен Николаев «Быһа лииньийэтигэр» ыытыллыбыт сылларыгар олохтоохтортон 10 тыһыынчаттан тахса ыйытыы киирбит. Олорго сорҕотугар Ил Дархан быһаччы эпиир кэмигэр хоруйдаабыта, атыттара тустаах министиэристибэлэр уонна биэдэмистибэлэр эппиэттииллэригэр ыытылылбыта.

Бастакы «Быһа лииньийэ» 2018 сыл балаҕан ыйын 2 күнүгэр буолбута, ол кэмҥэ Айсен Николаев өрөспүүбүлүкэ Ил Дарханын эбээһинэһин толорооччу дуоһунаһыгар сылдьыбыта. Бүтэһик эпиир 2025 сыл муус устар 27 күнүгэр ааспыта, онно олохтоохтор 1 437 ыйытыыны биэрбиттэрэ. «Быһа лииньийэлэр» үгэс курдук, суолталаах судаарыстыбаннай дааталарга – Саха Өрөспүүбүлүкэтин күнүгэр уонна Саха Өрөспүүбүлүкэтин Судаарыстыбаннаһын күнүгэр анаммыттара.

Ааспыт сылларга быһа эпиирдэр 2018 сыл балаҕан ыйын 2 күнүгэр, 2019 сыл муус устар 26 уонна балаҕан ыйын 26 күннэригэр, 2021 сыл муус устар 26 уонна балаҕан ыйын 27 күннэригэр, 2022 сыл муус устар 26 уонна балаҕан ыйын 26 күннэригэр, 2023 сыл муус устар 26 уонна балаҕан ыйын 26 күннэригэр, 2024 сыл муус устар 25 уонна балаҕан ыйын 24 күннэригэр, 2025 сыл муус устар 27 күнүгэр ыытыллыбыттар. 2020 сыллаахха хамсык дьаҥынан сылтаан «Быһа лиинньийэ» формааттаах эпиир социальнай ситимнэргэ быһаччы трансляцияҕа солбуллубута.

Нэһилиэнньэ саамай  элбэхтик: социальнай инфраструктураны саҥардыы, олорор дьиэ тутуута уонна дьону хаарбах дьиэлэртэн көһөрүү, тырааныспар уонна суол хаһаайыстыбатын сайыннарыы, социальнай өйөбүл миэрэлэрэ, куораттары уонна тыа сирдэрин тупсарыы, ону таһынан анал байыаннай дьайыы кыттыылаахтарын доруобуйаларын чөлүгэр түһэрии, социализациялааһын. «Быһа лииньийэ» үлэтигэр миниистирдэр уонна биэдэмистибэлэр салайааччылара, ону таһынан өрөспүүбүлүкэ араас муннуктарыттан быһа эпииргэ холбонор улуустар баһылыктара кытталлар.

Биэрии формата сайдан иһэр. Ол курдук, 2023 сыллаахха бастакытын ыйытыылар тематикаларын анаалыстааһыҥҥа уонна категорияларынан араарыыга нейросеть туттуллубута, ол эпиир бэбиэскэтин суһаллык оҥорорго кыаҕы биэрбитэ. Ону таһынан, дьоҥҥо табыгастаах буоллун диэн чат-боттар нөҥүө ыйытыылар ылыллаллар.

Айсен Николаев кэлэр «Быһа лииньийэтэ» 2025 сыл балаҕан ыйын 27 күнүгэр буолуоҕа. Олохтоохтор бэйэлэрин ыйытыыларын «Макс» мессенджер нөҥүө биэриэхтэрин сөп. Киирэр бары ыйытыылар тутатына үлэҕэ ылыллаллар, ону көрөр-истэр операторынан Эрэгийиэннээҕи салайар киин буолуоҕа.

Быһа эпиир солбуллубат ыытааччыларынан Олег Марков уонна Алёна Шестакова буолаллар. Быһа эпиир Саха Өрөспүүбүлүкэтин Судаарыстыбаннаһын күнүгэр,  балаҕан ыйын 27 күнүгэр, 19:00 чаастан  «Саха» НКИХ, «Якутия 24», «Россия 24» ханаалларга көстүөҕэ, «Тэтим», «Радио России», «Виктория Саха», «СТВ-радио» араадьыйаларга иһиллиэҕэ.

Ыйытыылары СӨ Эрэгийиэни салайар киинэ хомуйан саҕалаата, 8 (4112) 506-006 нүөмэр сарсыарда 9 чаастан 18 чааска диэри үлэлиир.  Итиэннэ телеграмҥа @voprosGlaveYakutii_bot чат-бот нөҥүө эмиэ ыытыахха сөп.

Сиһилии: https://www.sakha.gov.ru/news/12074