Ил Дархан Айсен Николаев Кытай посолун кытта көрүстэ

 «Бүгүҥҥү күҥҥэ Саха сирэ Уһук Илиҥҥи уокурукка  урутаан сайдыыга сүрүн локомотивынан буолар. 2022 сыл түмүгүнэн биһиги Уһук Илин федеральнай уокурукка эрэгийиэннээҕи баалабай бородууктаны оҥорууга (2 трлн солк)  инники күөҥҥэ тахсыбыппыт. Ааспыт 5 сылга эрэгийиэннээҕи баалабай бородуукта икки төгүл улаатта. Ааспыт сылга бырамыысыланнай үрдээһин 10 %-ҥа тэҥнэһэр. Бу — дойду үрдүнэн үчүгэй көрдөрүү», — диэн Айсен Николаев кэпсээтэ. Ил Дархан Саха сиригэр ИТ уонна креативнай индустрия, ол курдук, киинэни оҥоруу сайдыбытын туһунан иһитиннэрдэ.

Саха сирэ уонна Кытай Норуодунай Өрөспүүбүлүкэтэ биир ситимнээхтик үлэлээбиттэрэ ыраатта. 2004 сылтан Пекиҥҥэ эрэгийиэн бэрэстэбиитэлэстибэтэ үлэлиир. КНӨ провинцияларын кытта  эрэгийиэннэр икки ардыларынааҕы сыһыан күүһүрэр.  Холобур, Саха сирин 19 муниципальнай тэриллиитэ Кытай  Хэйлунцзян  уонна  Цзилинь провинцияларын 24 муниципалитеттарын кытта бииргэ үлэлиир сибээһи туппуттара.

Ил Дархан биир инникилээх бырайыагынан «Джалинда – Мохэ (КНР)» тырааныспартнай-логистическай комплексы тутууны ыйда.  Айсен Николаев посолга Саха сирин урутаан сайдар территорияларыгар Кытай инвестордара резидент быһыытынан кэлэллэрин биһирии көрсүөхпүт диэн эттэ.

Быйыл Саха сирэ Кытайдааҕы партнердарга Дьокуускай куоракка  «Саха сирэ  уонна Кытай  провинциялара: Арассыыйа-Кытай бииргэ буолууларын бөҕөргөтүү» диэн дьыалабыай форуму тэрийэр туһунан этиини киллэрдэ.  Форум көмөтүнэн атыы, үөрэх, билим, култуура, успуорт, туризм курдук салаалары сайыннарыыга улахан олугунан буолуоҕа. «Форум Саха сирэ уонна Кытай Норуодунай Өрөспүүбүлүкэтин провинциялара бииргэ үлэлииллэригэр улахан төһүү күүһүнэн, ону ааһан биһиги улуу дойдуларбыт сыһыаннара өссө бөҕөргүүрүгэр улахан көдьүүстээх буолуо», — диэн Айсен Николаев санаатын үллэһиннэ.

«Саха сирин кытта  таһаарыылаахтык бииргэ үлэлииргэ сүрүн акылаат түһэриллэн турар. Саха сиригэр инвестиционнай бырайыактары олоххо киллэриигэ сөптөөх усулуобуйа баар. Кытай Арассыыйаны кытта атыы-экэнэмиичэскэй сыһыаннаһыыга улахан суолтаны уурар. Биһиги Арассыыйаны кытта сыһыаннаһыыга бары күүспүтүн ууруохпут, ол курдук Саха сиригэр эмиэ.  Кытай предпринимателлэрэ бырайыактарын Саха  сиригэр киллэрэргэ уонна  өрөспүүбүлүкэ  олохтоох предпринимателлэрин кытта бииргэ үлэлииргэ бэлэмнэр. Онон  итинник хабааннаах бииргэ үлэлээһин икки өттүбүгэр таһаарыылаах буолуо диэн эрэнэбин», — диэн Арассыыйаҕа Кытай Норуодунай Өрөспүүбүлүкэтин  Ыксаллаах балаһыанньаҕа уонна  Боломуочуйалаах посола Чжан Ханьхуэй ‘эттэ.