Ил Дархан Алдаҥҥа байыаннай сулууспалаах дьиэ кэргэнигэр сырытта

«Көмө оҥоһуллар, төлөбүрдэр тиэрдиллибиттэр, олохтоох салалта бэйэтэ быһаарар боппуруостара бааллар. Дьоннор эмиэ көмөлөһөллөр. Мин байыаннай сулууспалаахтар дьиэ кэргэттэригэр барыларыгар чугас дьонноро түргэнник кыайыы көтөллөөх эргиллэн кэлэллэригэр баҕарабын«, — диэтэ Айсен Николаев.

Дьиэ кэргэн аҕа баһылыга Сергей Спирин быйыл балаҕан ыйыгар мобилизацияламмыт. Кэргэнэ Елена, уола Степа чааһынай дьиэҕэ олороллор. Оройуон олохтоохторо уонна олохтоох дьаһалта дьиэ кэргэҥҥэ көмөлөһөр, волонтёрдар соторутааҕыта тиэргэннэрин хаарын күрдьүбүттэр.

Бу ыал өрөспүүбүлүкэ биир кэмнээх төлөбүрүн ылбыт. Ону сэргэ, Сергей мобилизацияҕа барыар диэри үлэлээбит тэрилтэтэ эмиэ көмөлөспүт. Ил Дархан быстах байыаннай хомуурга барбыт байыас дьиэ кэргэнигэр бары наадалаах көмө оҥоһуллуоҕун бэлиэтээтэ.