Ил Дархан Алмааһы хостооччу күнүнэн эҕэрдэлээтэ

Ил Дархан Айсен Николаев «АЛРОСА» хампаанньа үлэһиттэрин уонна бэтэрээннэрин Саха Өрөспүүбүлүкэтин салалтатын уонна тус бэйэтин аатыттан эҕэрдэлээтэ.

— «АЛРОСА» АХ – биһиги өрөспүүбүлүкэбит экэниэмикэтин флагмана буолар – билиҥҥи кэмҥэ сөптөөх хайысханы тутуһан, тэтимнээхтик сайдар. Бүгүн биһиги Сахабыт сирин экэниэмикэтин сайдыытын сүрүннээн быһаарар, эһиги күннэтэ айар-тутар үлэҕитигэр ытыктабылбытын уонна махталбытын этэбит.

Бүтэһик 10 сыл иһигэр – «АЛРОСА» бөлөҕүн тэрилтэлэрэ Саха Өрөспүүбүлүкэтин бүддьүөтүгэр уонна кини оройуоннарын бүддьүөттэригэр 631 миллиард солкуобайы киллэрдилэр. Бу Саха сирин холбоһуктаах бүддьүөтүн дохуотун 35 бырыһыана буолар. Ону таһынан, бүтэһик 10 сылга «АЛРОСА» АХ  социальнай ороскуоттара 78 миллиард солкуобайтан таҕыста. Хампаанньа сыл ахсын өрөспүүбүлүкэ улуустарыгар көмөҕө, социальнай эбийиэктэри тутууга уонна саҥардыыга, Саха сирин олохтоохторугар суолталаах бырайыактары олоххо киллэриигэ, бөдөҥ спортивнай күрэхтэһиилэри уонна култуурунай тэрээһиннэри улахан үбү-харчыны ыытар.

Быйыл Саха сирэ Сэбиэскэй сойууска саамай баай алмаастаах  сирдэргэ – «Мир» уонна «Удачнай» кимберлит туруубкалара аһыллыбыттара 70 сылын, аан дойдуга саамай баай алмаастаах карьердартан биирдэстэрэ «Юбилейнай» 40 сылын, Мииринэй куорат 70 сылын уонна Мииринэй оройуона тэриллибитэ 60 сылын киэн тутта бэлиэтиир.

Ол кэмтэн ыла «АЛРОСА» АХ аан дойдуга алмаас салаатын лиидэринэн буолар. Хампаанньа аан дойдуга хостонор алмаас 29 бырыһыанын уонна Арассыыйаҕа 95 бырыһыанын ылар. 2024 сыллаахха алмаас хостонуутун кээмэйэ 33,1 мөлүйүөн караакка тэҥнэспитэ – бу аан дойду ырыынагын 31 бырыһыаныттан тахса.

«АЛРОСА» өрүү өрөспүүбүлүкэҕэ уонна дойдуга буолар сүрүн тэрээһиннэр кииннэригэр буолар. Хампаанньаҕа эр санаалаах хорсун дьон үлэлииллэр. 2024 сыллаахха Арассыыйа Бэрэсидьиэнэ Владимир Владимирович Путин ыйааҕынан, Удачнинскай ГОК үлэһитигэр, хорсун буойуҥҥа Николай Евдокимовка Ийэ дойду үрдүкү наҕараадата – Арассыыйа Дьоруойун аата иҥэриллибитэ.

Быйыл ураты ытыктабыл бэлиэтинэн, уон биир алмааһыгар Арассыыйа Дьоруойдарын ааттара иҥэриллибитэ – бу биһиги биир дойдулаахтарбыт, анал байыаннай дьайыыга ураты хорсун, дьоруойдуу быһыыны көрдөрбүт дьон.

Күндү доҕоттор! Бу ураты бэлиэ күҥҥэ – Саха сирин социальнай-экэнэмиичэскэй сайдыытыгар киллэрэр үлэҕитигэр уонна кылааккытыгар улахан махталбын тиэрдэбин. Сыралаах бииргэ үлэбитинэн ханнык баҕарар ыарахаттары туоруохпут диэн эрэнэбин.

Эйэни уонна чэлгийэ сайдыыны, бөҕө доруобуйаны, дьолу-соргуну, дьиэ кэргэн сылааһын, Арассыыйа Федерациятын уонна Саха Өрөспүүбүлүкэтин туһугар саҥа ситиһиилэри баҕарабын!

Сиһилии: https://www.sakha.gov.ru/news/8355