Ил Дархан анал байыаннай дьайыы кыттыылаахтарын кытта үлэни тэтимирдэргэ ыҥырда

Ил Дархан Айсен Николаев «Бииргэ Кыайыыга!» өрөспүүбүлүкэтээҕи хамыыһыйа мунньаҕын ыытта.

Аҕа баһылык анал байыаннай дьайыы кыттыылаахтарын социальнай реабилитациянан көхтөөхтүк хааччыйарга уонна кинилэр дьиэ кэргэттэрин өйүүргэ ыҥырда.  Мунньахха байыаннай эпэрээссийэ кыттааччыларын эбии тиэхиньикэнэн  уонна тэрилинэн хааччыйыы боппуруостарын эмиэ дьүүлэстилэр. Ол курдук,  «Сокол» внедорожниктары, БПЛА-лары, ону тэҥэ өрөспүүбүлүкэ тэрилтэлэриттэн массыыналары илдьиигэ, гуманитарнай көмөнү оҥорууга үлэ салҕанар.

Маны таһынан, Докучаевскай сиригэр-уотугар өрөмүөн-чөлүгэр түһэрии үлэтэ хайдах баран иһэрин ырыттылар. Айсен Николаев Донецкай Народнай Өрөспүүбүлүкэ баһылыга Денис Пушилин, ону тэҥэ Шахтерскай уонна Докучаевскай куораттар уокуруктарын баһылыктара инфраструктура бырайыактарын хаачыстыбалаахтык олоххо киллэрбиттэрин иһин махтал тылларын тиэртэ.

“Юрий Петрович Трутнев чуолаан Саха сирин  көхтөөх үлэтин бэлиэтээтэ. Саамай сүрүнэ – олохтоохтор биһиэхэ махтаныылара. Үлэ биир тэтимнээхтик  барар соругун толоруохпут  диэн бигэ эрэллээхпин”, – диэн бэлиэтээтэ Ил Дархан. 2025 сыллааҕы былааҥҥа 11 эбийиэк киирдэ. Еленовка куорат тииптээх бөһүөлэгэр Култуура дьиэтэ чөлүгэр түһэриллибитэ.

Успуорт комплексыгар уунан хааччыйыы уонна канализация систиэмэлэрин өрөмүөннэрэ  түмүктэнэн эрэллэр. Билигин Култуура уонна сынньалаҥ пааркатыгар уонна Оҕо уонна ыччат айар дьоҕурун дьиэтигэр чөлүгэр түһэрэр үлэ барар. Ил Дархан Ыччат киинин бырайыактыыр-симиэтэлиир докумуоннары оҥорон бүтэрэргэ дьаһал биэрдэ, онно IT-киин тэриллиэҕэ.

Мунньахха Андреевскай сэлиэнньэтигэр Тыа сиригэр духуобунай сайдыы киинин уонна Үөрэтэр комплекс ороскуоттарын симиэтэтин оҥоруу туһунан кэпсэттилэр. Бу эбийиэктэр кэлин өрөмүөн үлэтин былааныгар киириэхтэрэ. Бүгүҥҥү күҥҥэ Дьокуучаевскайга уонна куорат уокуругар киирэр Еленовкаҕа былааннаммыт 65 эбийиэктэн 40-тан тахсата чөлүгэр түһэриллибит уонна өрөмүөннэммит.

Санатан эттэххэ, 2024 сыллаахха өрөспүүбүлүкэ Дьокуучаевскайы чөлүгэр түһэриигэ ылсыбыта. Икки сыл иһигэр Саха сирэ Кировскай куоракка  50 социальнай эбийиэги чөлүгэр түһэрдэ. Чуолаан, куорат киин балыыһата, оскуолалар,  уһуййааннар уонна да атын социальнай эбийиэктэри саҥартылар.