Ил Дархан Анал этиитэ саҕаланыан иннинэ

Аҕыйах мүнүүтэнэн Саха Өрөспүүбүлүкэтин Ил Дархана Айсен Николаев Ил Түмэҥҥэ анаан Анал этиини оҥоруо. Ил Дархан болдьоҕун устата бу бэһис Анал этиитэ буолар.

Бүгүн Ил Түмэн дьокутааттара, СӨ Бырабыыталыстыбатын чилиэттэрэ, министиэристибэлэр, биэдэмистибэлэр, онтон да атын араас тэрилтэлэр салайааччылара, уопсастыба диэйэтэллэрэ саалаҕа муһуннулар.
Үгэс курдук Ил Дархан Анал этиитигэр социальнай-экэнэмиичэскэй сайдыы хайысхатыгар, чугас уонна уһун кэмнээх кэскили торумнуо. Мэлдьи буоларын курдук, ааһан эрэр сыл түмүгүн таһаарарыгар, 2021 с. биллэрбит Ийэ сылыгар аналлаах тэрээһиннэри, ситиһиилэри бэлиэтээн ааһыа. Бэлиэтээн эттэххэ, Ил Дархан былырыын туруорбут сүрүн соруктара туолан, Саха сирэ бары хайысхаҕа Уһук Илин уокурукка эрэ буолбакка, бүтүн Арассыыйа үрдүнэн бастыҥ көрдөрүүлээхтэр ахсааннарыгар киирдэ.
Онтон бүгүн чуолаан, тугу этэрэ өссө да биллэ илик. Ол эрээри, ааспыт сылга сэрэйэн да көрбөтөх, байыаннай балаһыанньабыт туһунан этии баар буолара саарбаҕа суох. Дойдуга анал байыаннай эпэрээссийэҕэ сыһыаннаах, онно кыттыбыт дьоҥҥо, кинилэр дьиэ кэргэттэригэр көмө, өйөбүл миэрэлэрэ сүрүн этиигэ киириэхтэрэ диэн сабаҕалыахха сөп. Биллэн турар, дьон олоҕо, киһи сыаннаһа биһиэхэ үрдүктүк тутулларынан, Саха сирин хас биирдии олохтооҕун олоҕун таһыма үрдүүрүгэр, уйгута улаатарыгар сорук туруо дии саныыбыт. Итини сэргэ, бу ааспыт Анал этиилэргэ үгүстүк таарыллыбытынан сылыктаатахха, Арктика сайдыытын инники кыахтара, бүддьүөт үлэһиттэрин хамнастарын үрдэтии, тыа хаһаайыстыбатын итиэннэ бырамыысыланнаһы сайыннарыы боппуруостара эмиэ болҕомто киинигэр тутуллуохтара.