Ил Дархан араадьыйа үбүлүөйүнэн эҕэрдэлээтэ

Бүгүн, сэтинньи 7 күнүгэр Саха араадьыйата үбүлүөйүн бэлиэтиир. Лоп курдук  95 сыл анараа өттүгэр, 1930 сыллаахха «Болҕойуҥ, саҥарар Дьокуускай!» диэн устуоруйаҕа киирбит тыллар аан бастаан эпииргэ иһиллибиттэрэ. Ил Дархан Айсен Николаев араадьыйа үлэһиттэрин бу бэлиэ күнүнэн эҕэрдэлээтэ. 

Ил Дархан араадьыйа үлэһиттэригэр өрөспүүбүлүкэ сайдыытыгар киллэрбит  кылааттарын билинэн, социальнай ситимҥэ эҕэрдэ тылларын эттэ.

«Бүгүҥҥү күҥҥэ араадьыйа кэми кытта тэҥҥэ, түргэнник сайдан иһэр. Күн аайы, сарсыардаттан саҕалаан, араадьыйата өрөспүүбүлүкэ араас муннуктарыгар олорор дьоҥҥо суһал уонна суолталаах сонуннары тиэрдэр», — диэн суруйда.

Айсен Николаев араадьыйа үлэһиттэригэр уонна бэтэрээннэригэр сыралаах үлэлэрин, идэлэригэр бэриниилээхтэрин иһин махталын биллэрдэ.

«Араадьыйа үлэһиттэрин араас көлүөнэлэрэ сүрдээх улахан үлэни толордулар, хас биирдиилэрэ өрөспүүбүлүкэ сайдыытыгар тус бэйэтин кылаатын киллэрдэ. Саха араадьыйата өрөспүүбүлүкэҕэ хас биирдии дьиэҕэ иһилиннин! Араадьыйа кэлэктибигэр махталлаах истээччилэри, өрөспүүбүлүкэбит, дойдубут туһатыгар элбэх үтүө информацияны баҕарабын!» диэн өрөспүүбүлүкэ баһылыга тоһоҕолоон бэлиэтээтэ.

Сиһилии: https://www.sakha.gov.ru/news/15060