Ил Дархан: Арассыыйа Бэрэсидьиэнэ Арктика сайдыытыгар сүрүн соруктары туруорда

Арассыыйа Бэрэсидьиэнэ Мурманскайга ыытыллыбыт VI норуоттар икки ардыларынааҕы Арктическай пуорум пленарнай мунньаҕар этиитигэр дойду Арктическай зонатын кэскиллээх сайдыытыгар туһуламмыт соруктары бэлиэтээтэ.

Ил Дархан Айсен Николаев бэлиэтээбитинэн, судаарыстыба баһылыга көтөҕөр сүрүн  соруктарыгар дойду суверенитетын уонна национальнай интэриэстэрин көмүскээһин,  өр кэмнээх социальнай-экэнэмиичэскэй уонна транспортнай-логистическай сайдыы, научнай чинчийиилэри ыытыы, килиимэт уларыйыытын, ирбэт тоҥу үөрэтии уонна кэтээн көрүү  айылҕаны харыстааһын, Уһук Хотугу нэһилиэнньэлээх пууннары тупсарыы, генеральнай былааннары оҥоруу, дьон олоҕун хаачыстыбатын тупсарыыга тэтимнээх үлэни ыытыыны уурбутун тоһоҕолоон эттэ.

“Арктика инники сайдыытыгар, олох хаачыстыбатын тупсарыыга туһуламмыт бары национальнай бырайыактарга Арктиканы сайыннарыы ураты тутуллара наада. Оччотугар хоту нэһилиэнньэлээх пууннарыыны тупсарыы үлэтэ өссө тэтимириэ этэ. Биллэн турар, доруобуйа харыстабылын, үөрэх уонна тырааныспар инфраструктуратын сайыннарыыга туспа көрүү наада. Хотугу муора суолун бөҕөргөтүүтүн (ол иһигэр Тиксини уонна Найбаны киллэрэн туран), генеральнай былааннары олоххо киллэриигэ сорудахтара Арктика территорияларыгар мэдиссиинэ көмөтүн тупсарыыга, пассажирдары таһар салгын сырыытын сайыннарыыга, хаарбах дьиэттэн көһөрүүгэ уонна хотугу нэһилиэнньэлээх пууннары тупсарыыга туһуламмыттар. Хотугу муора трассатын сайыннарыы, ледокол флотун бөҕөргөтүү, Арассыыйаҕа уу суудуналарын оҥорор уонна өрөмүөннүүр тэрилтэлэри өйөөһүн, аныгы тырааныспар уонна логистика схемаларын, аэропортары саҥардыы– бу барыта дьон олоҕун тупсарыыны хааччыйыаҕа”,— диэн бэлиэтээтэ Айсен Николаев пленарнай мунньах түмүгүн туһунан санаатын үллэстэригэр.

Кулун тутар 26–27 күннэригэр Мурманскайга норуоттар икки ардыларынааҕы VI Арктическай пуорум Хотугу муора суола арыллыбыта 500 сылыгар ананна уонна РФ бырабыыталыстыбатын өйөбүлүнэн «Росконгресс» пуонда тэрийиитинэн ыытылынна. Пуорумҥа 21 дойдуттан 1200-тэн тахса киһи кыттыыны ылла.