Ил Дархан «Арассыыйа» быыстапка-пуорумҥа ДНӨ үөрэнээччилэрин кытары көрүстэ

Ил Дархан Айсен Николаев дуорааннаах тэрээһин түһүлгэтигэр ДНӨ Кировскай куоратын үөрэнээччилэрин уонна Саха сириттэн Усуйаанаттан тиийбит оҕолору кытары көрүстэ.

Көрсүһүүгэ «Алеша» тааҥка чилиэннэрэ — Арассыыйа Дьоруойа лейтенант Александр Леваков уонна ефрейтор Алексей Неустроев кыттыыны ыллылар.

Москваҕа ДНӨ бэрэстэбиитэлистибэтин баһылыга Ольга Макеева бу Саха сирэ Кировскайга көмөлөһөрүгэр махтал бэлиэтинэн буоларын эттэ. Бииргэ үлэлээһин иитинэн социальнай инфраструктуралар чөлүгэр түһэриллэллэр, ол иһигэр оскуолалар, оҕо саадтара, успуорт былаһааккалара тутуллаллар, оҕолор сынньалаҥ уонна доруобуйаны чэбдигирдэр лааҕырдарга сынньаналлар, Саха сириттэн сылдьар саастыылаахтарын кытары көрсөр уонна кэпсэтэр кыахтаналлар.

«Оскуолабытын, куораппытын чөлүгэр түһэриигэ үлэ тиһиктээхтик ыытылларыгар Саха сиригэр, Ил Дархан Айсен Сергеевич Николаевка махтанабыт. Биһиги Саха сирин дьонун-сэргэтин кытары үөрэ-көтө кэпсэтэбит, үгэстэрин наһаа сэргиибит. Саха сиригэр бара сылдьыахпытын наһаа баҕарабыт. Устуоруйаларын, култуураларын үчүгэйдик билэр-көрөр киһи. Ыраахтан кэлбит саастыылаахтарбытын кытары билистибит, «Атом» экспозицияҕа, экскурсияҕа бииргэ сырыттыбыт, элбэҕи көрдүбүт-иһиттибит», — диир Кировскайтан кэлбит 10 кылаас үөрэнээччитэ Ростислав Голинка.

«Мин Саха сирин бары олохтоохторугар махтаныахпын баҕарабын, — диэн этэр эмиэ Кировскайтан кэлбит 11 кылаас үөрэнээччитэ Анна Высоцкая. — Биһиги 2-с №-дээх оскуолаҕа үөрэнэбит. Онно хапытаалынай өрөмүөн оҥорбуттара. Онон кыһабыт ДНӨ саамай кырасыабай оскуола! Саха сирин экспозициятын наһаа сэҥээрэн көрдүм, барытын сөбүлээтим. Саха сиригэр элбэх доҕоттордоохпун, кинилэри көрсүөхпүн, эрэгийиэни көрүөхпүн олус баҕарабын«.

Икки өрөспүүбүлүкэ эдэркээн олохтоохторо Москва кэрэ-бэлиэ миэстэлэринэн сырыттылар, далааһыннаах тэрээһин быыстапкаларын сөҕө-махтайа көрдүлэр. «Атом» павильоҥҥа, «Движения первых» былаһааккаҕа сылдьаннар кинилэргэ анаан тэриллибит интэриэһинэй дьоннуун көрсүһүүлэртэн улаханнык сэргэхсийдилэр, сонурҕаатылар.

Маны сэргэ, үөрэнээччилэр «Как рассказать о своей родине, чтобы твои ролики смотрели миллионы» маастар-кылааһы улаханнык сэҥээрдилэр. Бу маастар-кылааһы «Смотри, это Россия!» видеонан аккырыыккалар Бүтүн Арассыыйатааҕы куонкурустарыгар бэлэмнэнии иитинэн, биллиилээх айанньыт, тревел-блогер Богдан Булычев ыытта. Күөн күрэс, Саха сирин көҕүлээһининэн ыытыллар, манна Саха сириттэн уонна ДНӨ кытталлар. Былырыыҥҥы күрэскэ бу эрэгийиэннэртэн саамай элбэх ролигынан кыттыбыттара бэлиэтэнэн турар.

«Арассыыйа» норуоттар икки ардыларынааҕы быыстапка-пуорум РФ Бэрэсидьиэнэ Владимир Путин сорудаҕынан 2023 сыл сэтинньи 4  күнүттэн 2024 сыл муус устар 12 күнүгэр диэри салҕанар. Тэрээһиҥҥэ дойду сүрүн ситиһиилэрин, эрэгийиэннэр туһалаах үөрүйэхтэрин, норуоттар олохторун-дьаһахтарын, үгэстэрин, сиэрдэрин-туомнарын көрдөрүөхтэрэ, билиһиннэриэхтэрэ.

СӨ Ил Дарханын уонна Бырабыыталыстыбатын пресс-сулууспата