Ил Дархан Арассыыйа киинэтин күнүнэн эҕэрдэлиир

Саха Өрөспүүбүлүкэтин салалтатын аатыттан уонна тус бэйэм ааппыттан эһигини Арассыыйа киинэтин күнүнэн эҕэрдэлиибин!

Киинэ ускуустубата биһиэхэ умнуллубат өйдөбүллэри, интэриэһинэй кэпсээннэри бэлэхтиирин таһынан, олох туһунан дириҥник толкуйдуурга күһэйэр уонна айарга-тутарга кынаттыыр. Хас да сахалыы киинэ биһиги өрөспүүбүлүкэбитигэр эрэ буолбакка, онтон ыраах тас дойдуларга үгүс киһи сүрэҕин сүүйбүтэ үөрдэр. Төрөөбүт дойдуга таптал, силискэ-мутукка төннүү, истиҥ иэйии – биһиги киинэлэрбитигэр баар бу үйэлээх сыаннастар көрөөччүгэ наадалаахтар, кинилэр биһирэбиллэрин ылаллар. Биһиги талааннаах режиссердарбытынан, артыыстарбытынан, дойду киинэтин ускуустубатын сайдыытыгар таһаарыылаах үлэлэринэн кылааттарын киллэрэр бары исписэлиистэрбитинэн киэн туттабыт.

Быйылгы сыл бастакы аҥаарын түмүгүнэн саха киинэлэрэ прокатка 192 мөлүйүөн солкуобайы хомуйдулар — бу 2024 сыллааҕы көрдөрүүнү куоһарар. Биһиги киинэлэрбит кэнники алта сыл иһигэр норуоттар икки ардыларынааҕы уонна Арассыыйатааҕы киинэ бэстибээллэригэр 280-тан тахса наҕарааданы ыллылар. Бу улахан ситиһии эрэгийиэн киинэтин кыахтарын туһунан өйдөбүлү уларытта. Манан барыта – өрөспүүбүлүкэҕэ киинэ ураты экосистематын тэрийиигэ улахан үлэ түмүгэ.

Биһиэхэ сүүрбэттэн тахса киинэ устуудьуйата уонна айар кэлэктиип үлэлиир-хамсыыр, салаа сүрүн хамсатар күүһүнэн «Сахафильм» киинэ хампаанньата буолар. Судаарыстыбаннай өйөбүл туһунан эрэгийиэннээҕи сокуон уонна Киинэ индустриятын, анимацияны уонна сыыппара контенын оҥорууну сайыннарыы кэнсиэпсийэтэ ылылыннылар.

«Үлэ кыбаартала» айар-тутар кластерга резиденнэргэ киинэ уһуларга, муусука айарга, тэрээһиннэри ыытарга аналлаах аныгылыы устуудьуйалар бэрилиннилэр. Куонкурус түмүгүнэн киинэ оҥорооччуларга субсидия бэриллэр – биэс сыл иһигэр 38 бырайыак өйөбүлү ылла. Өрөспүүбүлүкэ киинигэр Дьокуускайдааҕы норуоттар икки ардыларынааҕы киинэ бэстибээлэ ыытыллара үгэскэ кубулуйда. Быйыл от ыйыгар ыытыллыбыт VIII бэстибээл Арассыыйаттан, Францияттан, Италияттан, Непалтан, Ирантан, Индонезияттан, Бразилияттан уонна АХШ-тан киинэлэри түмтэ.

Арассыыйа Бэрэсидьиэнэ Владимир Путин Дьокуускайга  оҥорон таһаарыы эргиирин хааччыйар тэриллээх элбэх хайысхалаах киинэ павильонун тутуутун өйөөбүтэ. Ону таһынан, Дойду баһылыгын сорудаҕынан дойду Бырабыыталыстыбата «Экстра Синема» технологиятын «Дьиэ кэргэн» национальнай бырайыакка киллэрдэ. Саха оҥорооччуларын киинэ-платформаларын туһаныы географията кэҥээн иһэр – Индияҕа маннык 10 тыһыынча киинэ саалата тэриллиэҕэ. Кинилэртэн бастакылара бу ыйга Ассам штатыгар Тиху куоракка аһыллыаҕа.

Инникитин да биһиги кинематографияны өйүөхпүт, киинэлэрбитин сырдатыахпыт. Уонна бу бэлиэ күҥҥэ киинэ индустриятын бары үлэһиттэригэр дьыалаларыгар бэриниилээхтэрин, сыалга-сорукка дьулуурдарын иһин махталы тиэрдэбин.

Күндү доҕоттор! Эһиэхэ айар кынаты, уостубат эрчими, интэриэһинэй бырайыактар олоххо киирэллэрин баҕарабын! Хас биирдии саҥа киинэ саҥа чыпчаалларга хардыы буоллун уонна көрөөччүлэр сүрэхтэригэр уһун сылларга хааллын.