Хаартыска Ил Дархан телеграмм-ханаалыттан ылылынна
Ааспыт нэдиэлэҕэ Арассыыйа Судаарыстыбаннай сэбиэтин үс хамыыһыйатын мунньаҕа буолан ааста.
Самара губернатора Вячеслав Федорищев бэрэссэдээтэллээх «Бырамыысыланнас» хамыыһыйатыгар массыына оҥоруутун араас хайысхаларыгар систиэмэлээх кутталлары уонна дойду иһинээҕи ырыынагы харыстыыр дьаһаллары дьүүллэстилэр. Онно судаарыстыба өйөбүлүн бырагыраамаларын көннөрүүнү, оборона сакааһыгар сыананы олохтооһун мэхэньиисимин ситэрэн оҥорууну, бэйэ оҥорор бородууксуйатыгар сакааһы элбэтиини, Соҕуруу-Илиҥҥи Азия түргэнник сайдар ырыынагар тахсыы курдук экспорты көҕүлээһин боппуруостара ырытылыннылар.
Мунньах тиэмэтин туһунан этэригэр, Бэрэсидьиэн көмөлөһөөччүтэ, Арассыыйа Судаарыстыбаннай сэбиэтин сэкирэтээрэ Алексей Дюмин биһиги тэрилтэлэрбитин харыстыырбытыгар эбии үп-харчы инструменнарын оҥорорбут суолталааҕын тоһоҕолоон бэлиэтээтэ. Кини бастыҥ кэскиллээх бырайыактары олоххо киллэрэргэ чэпчэтиилээх усулуобуйаҕа бүддьүөттэн таһынан үбү-харчыны тардар анал мэхэньиисими толкуйдуохтаахпыт диэтэ.
Оттон Калужскай уобалас губернатора Владислав Шапша салайааччылаах «Каадырдар» хайысхаҕа хамыыһыйа дьүүллэһиитигэр технологическай суверенитеты хааччыйыыга каадырдары бэлэмнээһин туһунан кэпсэттилэр.
Манна Арассыыйа наукатын каадырын бөҕөргөтүүгэ туһуламмыт сокуону оҥоруу көҕүлээһиннэрин туһунан дьүүллэстилэр. Үөрэх бэлиитикэтигэр тиһиктээх сыһыан, ону тэҥэ Арассыыйа наукатын научнай, инженернэй, техническэй, административнай каадырдарынан хааччыйар дьаһаллар көрүлүннүлэр. Кэпсэтиигэ өссө атомнай салааҕа каадырдары бэлэмнээһин, ядернай мэдиссиинэ инники күөҥҥэ турар технологиялара уонна чинчийэр инфраструктура туһунан этилиннэ.
Ааспыт нэдиэлэ бүтүүтэ СӨ Ил Дархана Айсен Николаев салайааччылаах анал хамыыһыйаҕа энергетика салаатын сайыннарыы боппуруостара дьүүллэһилиннилэр. Мунньахха Арассыыйа Уһук Илини уонна Арктиканы сайыннарыыга миниистирэ Алексей Чекунков кыттынна. Хамыыһыйа чилиэннэрэ Сибиир, Уһук Илин уонна Арктика сиригэр-уотугар ыраах сытар энергетическэй оройуоннарыгар эрэллээх уотунан хааччыйыыга этиилэри дьүүллэстилэр. Биир сүрүн быһаарыынан – 2028 сылга диэри мунньуллар Уһук Илиҥҥи эбии төлөбүрү туһанан оҥоһуллар эбийиэктэри саҥардыыны 2035 сылга диэри уһатарга диэн буолла. Маны таһынан, энергетическэй бырайыактарга бырыһыан ставкаларын субсидиялыырга, саҥа көҕүлээһиннэри түргэнник олоххо киллэрэргэ сокуон баазатын тупсарарга, ону тэҥэ саҥардыы бырагыраамаларыгар эрэгийиэннэр уонна муниципальнай тэриллиилэр кыттыыларын кэҥэтэргэ этилиннэ.
«Хамыыһыйа мунньаҕар биисинэс, наука, судаарыстыбаннай былаас уорганнарын өттүттэн олус интэриэһинэй, араас этии киирдэ. Бу быһаарыылары барытын ырытан көрүөхпүт. Биһиги хамыыһыйабыт маны барытын дойду бырабыыталыстыбатыгар киллэриэ. Ити боппуруоһунан Алексей Дюмиҥҥа киирэ сылдьыбыппыт, кини биһиги хамыыһыйабыт үлэтин болҕойон кэтиир уонна мэлдьи өйүүр. Кини өйөбүлүнэн энергетика сайдыытын боппуруостара билигин Судаарыстыбаннай Сэбиэт биир сүрүн үлэтин хайысхатынан буолаллар», — диэн Айсен Николаев хамыыһыйа мунньаҕын түмүгүнэн санаатын үллэһиннэ.
Уус Алдан улууһун Дүпсүн нэһилиэгин олохтоохторо, чуолаан "Сардаҥа" оҕо уһуйаанын иитиллээччилэрэ уонна үлэһиттэрэ Дьокуускайга уонна…
Өрөспүүбүлүкэтээҕи харах килиниичэскэй балыыһатын кылаабынай бырааһа Иван Луцкан Арассыыйа Бэрэсидьиэнин Ыйааҕынан Пирогов уордьанын ылар чиэскэ…
Үөрэх уонна билим миниистирэ Нюргуна Соколова суруналыыстары кытта көрсөн ааһан эрэр сыл барыллаан түмүгүн кэпсээтэ,…
Дьокуускайга "Дохсун" успуорт комплексыгар СӨ физическэй култууратын уонна успуордун министиэристибэтин түмүктүүр тэрээһиннэрэ саҕаланнылар. Ону сэргэ,…
Сааһырбыт киһи доруобуйатын күннэтэ көрүнэр, чэбдигирдэр буоллаҕына, уһуннук доруобай, чөл туруктаах сылдьыан сөп. Сааһырбат дьоҥҥо…
Кини граҥҥа киирсиитэ бу бастакы сырыыта буолбатах. Ол курдук, СӨ Тыатын хаһаайыстыбатын уонна ас-үөл бэлиитикэтин…