Ил Дархан Арассыыйа уонна өрөспүүбүлүкэ судаарыстыбаннай наҕараадаларын туттарда

Саҥа дьылы көрсө Ил Дархан Айсен Николаев уһулуччулаах биир дойдулаахтарбытыгар Арассыыйа уонна Саха Өрөспүүбүлүкэтин судаарыстыбаннай наҕараадаларын туттарда.

“Ааһан эрэр сылы биһиги элбэх салааҕа ситиһиилэрдээх атааран эрэбит. Саха сирэ ханнык баҕарар ситиһиитэ, туох баҕарар уустуктары туорааһына олохтоохтортон тутулуктаах. Бүгүн  наҕараадаламмыттар бары араас саастаах, идэлээх дьон. Ол эрээри, кинилэри барыларын биир сомоҕолуур – үлэҕэ уонна дойдуга таптал. Кинилэр биһиги уопсастыбабытын бөҕөргөтөллөр, атыттары сирдииллэр. Хас биирдиигитигэр истиҥник махтанабын. Саха сирэ киэн туттар!

Саха Өрөспүүбүлүкэтин үрдүкү наҕараадатын – “Хотугу сулус” уордьаны Карл Иннокентьевич Васильев тутта. Карл Иннокентьевич 28 сыл устата “СӨ Комдрагметалл” тэрилтэтин салайбыта, күн бүгүҥҥэ диэри генеральнай дириэктэр сүбэһитинэн үлэлээн уопсастыба сайдыытыгар кылаатын киллэрэ сылдьар.

Барыгытын наҕараадаҕытынан эҕэрдэлиибин! Кэлэн иһэр Саҥа сылынан! — диэн тус телеграм ханаалыгар үөрүүтүн үллэстэр.

Итиэннэ наҕараадаламмыттарга эрэннэрбитим курдук бары хаартыскалар тус бэйэм “ВКонтакте” страницабар туспа паапканан тахсыахтара диэн сигэтин ыйар: https://vk.com/album532632737_304385520