Ил Дархан Арассыыйаҕа киинэ күнүнэн эҕэрдэлиир

Саха сирин ытыктабыллаах олохтоохторо!

Саха Өрөспүүбүлүкэтин салалтатын уонна тус бэйэм ааппыттан эһигини Арассыыйаҕа киинэ күнүнэн эҕэрдэлиибин!

Киинэ хас биирдии киһи дууһатын таарыйар, долгутар уратылаах. Үчүгэй киинэлэр киһиэхэ иэйиини уонна үөрүүнү бэлэхтииллэр, элбэҕи толкуйдаан көрөргө сирдииллэр. Маныаха Арассыыйа киинэлэрин ортолоругар көрөөччүлэр биһирэбиллэрин ылбыт Саха сирин киинэлэрэ эмиэ бааллара үөрүүлэх.

Биэс сыл анараа өттүгэр биһиги бу хайысхаҕа биһиэхэ уһуллан тахсар киинэлэри Арассыыйаҕа сэргииллэрин, сэҥээрэллэрин курдук үлэлэһэргэ киинэни устааччылары (кинематографистары) кытта кэпсэтэн улахан сыалы-соругу туруорбуппут. Бүгүн ити сыалы ситистибит диэн эрэллээхтик этиэхпитин сөп. Киинэлэрбит өрөспүүбүлүкэ киэн туттуутунан буоллулар, көрөөччүлэр сүрэхтэрин сүүйэн, тапталларын ылан, иннин диэки дьулуурдаахтык хардыылыыр кыахтаннылар. Маныаха кэнники кэмҥэ Саха сирин киинэлэрэ норуоттар икки ардыларынааҕы уонна Арассыыйа таһымнаах 60- тан тахса улахан наҕараадалары ылбыттара ону туоһулууллар. Бу бэйэлэрин дьыалаларыгар ис сүрэхтэриттэн ылсыбыт бэриниилээх дьон, биир санаалаахтар айымньылаахтык үлэлиир кэлэктииптэрин сүҥкэн үлэлэрэ буолар.

Билигин Саха сирэ Москва уонна Санкт-Петербург курдук улахан, киэҥ-куоҥ куораттар кэннилэриттэн тилэх үктэһэн, киинэни устан, оҥорон таһаарыыга үһүс миэстэҕэ сылдьар. Өрөспүүбүлүкэбитигэр киинэ устуутунан, оҥоруутунан 20-тэн тахса айар кэлэктиип, киинэ устуудьуйалара дьарыктаналлар. Эспиэрдэр Саха сирин киинэлэрин уратыларын уонна ону устан киэҥ эйгэҕэ таһаарарга оҥоһуллар өйөбүллэр тустарынан бэлиэтииллэр.

Өрөспүүбүлүкэбитигэр бу салааҕа көмөлөһөргө ураты үлэ ыытыллар. 2020 сылтан куонкуруска олоҕуран киинэ оҥорон таһаарааччыларга субсидия бэриллэр. 2022 сылга биһиги судаарыстыбаннай өйөбүл миэрэлэрин тиһиктээх оҥорорго ылсыбыппыт. Сыл саҕаланыыта киинэни устан, оҥорон таһаарыы, анимация сайдыытыгар Кэнсиэпсийэ бигэргэтиллибитэ.

Биһиги, маны сэргэ, бэйэбит инфраструктурнай бырайыактары олоххо киллэрэбит, олор ортолоругар Арассыыйаҕа Уһук Илини сайыннарыы министиэристибэтин өйөбүлүнэн арыллыбыт «Үлэ кыбартаала» креативнай кластеры ааттыыбыт. Манны тутаах хайысхалартан биирдэстэринэн киинэ, анимация, медиа, цифровой контент уонна дизайн ааттаналлар.

Биһиги этиилэрбит саамай үрдүк таһымҥа билиниини, өйөбүлү ылаллар. Соторутааҕыта РФ Бэрэсидьиэнэ Владимир Владимирович Путин Дьокуускайга киинэ устарга анаан элбэх функциялаах дьиэни (павильону) тутары хааччыйарга сорудахтаата. Бу биһиги хотугу усулуобуйабытыгар сылы эргиччи киинэни устарга кыаҕы биэриэ. Ону сэргэ, Арассыыйа Бэрэсидьиэнэ РФ Бырабыыталыстыбатыгар «Экстра Синема» сахалыы киинэни устан таһаарааччылар технологияларын киинэ кыра саалаларыгар туһанар кыаҕы көрөллөрүгэр соруйда.

«Экстра Синема» бырайыак өрөспүүбүлүкэҕэ дьоҕус нэһилиэнньэлээх пууннарга уонна култуура дьиэлэригэр 2022 сылтан тиһиктээхтик үлэлиир. Манна сыһыары тутан эттэххэ, былырыын киинэ көрөр 10 саала арыллыбыта, 2023 сылга итинник 17 саалаланныбыт.

Биһиги киинэни устууну, оҥорууну салгыы өйүөхпүт.

Бу бэртээхэй бырааһынньык күн бу салааҕа үлэлэспит, үлэлэһэр бары дьоҥҥо, бэтэрээннэргэ, бу эйгэҕэ үлэни олохторун аргыһа оҥостубут дьоҥҥо, бэриниилээх, айымньылаах уонна таһаарыылаах үлэҕит иһин махтанабын.

Күндү доҕоттор! Бука барыгытыгар таһаарыылаах үлэни, дьолу-соргуну, ситиһиилэри баҕарабын!

Саха Өрөспүүбүлүкэтин Ил Дархана А.С. Николаев