Ил Дархан байыаннай кэрэспэдьиэннэргэ махтанна

Дьокуускайга бэс ыйын 26 күнүгэр «ProДФО – Всё для Победы!» пуорум чэрчитинэн, «МедиаАкадемия» бырайыак блиц-тренинэ буолла. Манна судаарыстабннай уорганнар уопсастыбаннаһы уонна көрдөрөр-иһитиннэрэр сириэстибэлэри кытта сыһыаннарын боппуруостарын ырытыстылар. 

Ил Дархан блиц-трениҥҥэ Кыайыыны уһансарга өрөспүүбүлүкэ кылаатын туһунан кэпсээтэ. Байыаннай дьайыы саҕаланыаҕыттан 39 байыаннай чааска материальнай, техническэй көмө тиэрдиллибитэ. Саха сириттэн сылдьар байыастары хааччыйарга бырамыысыланнай тэрилтэлэр уонна оҥорон таһаарааччылар эмиэ кытталлар. Өрөспүүбүлүкэ бары олохтоохторо бары көмөнү оҥороллор.

Өрөспүүбүлүкэҕэ байыаннай дьайыы кыттыылаахтарыгар уонна кинилэр дьиэ кэргэттэригэр 19 араас көмө миэрэтэ оҥоһуллар. Дьокуускайга «Аҕа дойдуну көмүскээччилэр» пуонда отделениета үлэлиир.

Москваҕа Саха сирин Бастайааннай бэрэстэбиитэлистибэтигэр уонна атын куораттарга тирэх пууннар тэриллибиттэрэ. Онон гуманитарнай көмө тиэрдиллэ турар. Киин куораттарга волонтердар үчүгэйдик үлэлииллэр.

Кировскай куораты кытта шефтэһэн, былырыын 32 социальнай-экэнэмиичэскэй эбийиэги чөлүгэр түһэрбиттэрэ. Быйыл 28 эбийиэккэ үлэ барар.

— Билигин дойдубутугар чуумпута суох күннэр тураллар. Биһиги бэрэсидьиэммит тула түмүстэхпитинэ, туох да самнарар кыаҕа суоҕун туһунан бу күннэр өссө төгүл туоһулаатылар. Бу маннык өйү-санааны үөскэтэргэ көрдөрөр-иһитиннэрэр сириэстибэлэр оруоллара улахан. Информация кырдьыктаах, сыаналаах буолуохтаах. Онон идэҕитигэр, эппиэтинэскитигэр хаһааҥҥытааҕар да үрдүк ирдэбиллэр тураллар, — диэн Айсен Николаев эттэ.

Чечняҕа Гудермес куоракка спецназтары бэлэмниир Арассыыйатааҕы университекка Саха сириттэн суруналыыстар баран, байыаннай кэрэспэдьиэн кууруһугар үөрэнэн кэлэллэр.

Ил Дархан байыаннай кэрэспэдьиэннэргэ махтанна. Кинилэр кутталлаах быһыыга-майгыга тиийэн, байыастар хайдах сэриилэһэллэрин, Саха сирин тутааччылара Кировскайга хайдах үлэлииллэрин туһунан кырдьыктаах балаһыанньаны көрдөрөллөрүн бэлиэтээтэ.

— Байыаннай кэрэспэдьиэннэр ахсааннарынан биһиги дойдуга инники күөҥҥэ сылдьабыт. Фронт сонуннарын бастакы уочарат, быһалыы билэ-көрө олоробут. байыаннай кэрэспэдьиэннэрбит үлэлиэхтэриттэн, информационнай балаһыанньа тупсубута, — диэн Айсен Николаев эттэ.

Блиц-трениҥҥэ ДНӨ баһылыгын сүбэһитэ, Донбасска байыаннай дьайыылар бэтэрээннэрэ Игорь Кимаковскай, РФ Уопсастыбаннай балаататын хамыыһыйатын чилиэнэ Наталья Кашперскайя, ВГТРК анал кэрэспэдьиэнэ, «Алания», «Осетия» батальоннар байыаннай кэрсэпэдьиэннэрэ Георгий Мамсуров кытыннылар. Кимаковскай «Якутия с Донбассом» киинэни устан аҕалбытын көрдөрдө, Саха сирин олохтоохторугар көмөлөрүн иһин махтанна.

Ил Дархан, бырабыыталыстыба дьаһалтатын пресс-сулууспата.