Ил Дархан байыас дьиэ кэргэнин кытта көрүстэ

Ил Дархан Айсен Николаев Сунтаар улууһугар оробуочай сырыытын кэмигэр байыаннай эпэрээссийэ кыттыылааҕын дьиэ кэргэнин кытта көрүстэ. Эр киһи былырыын күһүн мобилизацияламмыт.

Байыас дьиэ кэргэнэ Элгээйи сэлиэнньэтигэр олорор. Кэргэнэ Татьяна Алексеевна, оҕолоро Арина уонна Максим аҕаларын кэтэһэллэр. Көрсүһүүгэ Татьяна кэргэнин кытта сибээһи быспакка мэлдьи кэпсэтэрин туһунан эттэ.

«Кинилэри үчүгэйдик хааччыйаллар, ону таһынан өрөспүүбүлүкэ опорнай пуунуттан гуманитарнай көмө мэлдьи оҥоһуллар. Уоппускаҕа наһаа күүтэбит», — диэн ыал ийэтэ бэлиэтээтэ.

Байыас дьиэ кэргэнэ үп-харчы өттүнэн өйөбүлү ылар, итиэннэ олох-дьаһах кыһалҕаларын быһаарыыга муниципалитет уонна уопсастыбыннай түмсүүлэр куруук көмөлөһөллөр. Ону сэргэ волонтердар иһэр уу, оттук мас бэлэмнээн биэрбиттэр.