Ил Дархан байыас ийэтин кытта көрүстэ

Олунньу 6 күнүгэр Айсен Николаев анал байыаннай дьайыы кыттыылааҕын ийэтэ, волонтер Светлана Диодорованы-Лаврентьеваны кытта көрүстэ. Кинилэр байыаннай сулууспалаахтар төрөппүттэрин волонтерскай үлэлэрин туһунан кэпсэттилэр.

Ил Дархан волонтердар фроҥҥа көмөлөрүн иһин махтанна уонна үлэни тупсарыы туһунан этиилэри иһиттэ.

— Билигин төрөппүттэр инники кирбиигэ сылдьар уонна байыаннай госпиталларга эмтэнэ сытар уолаттарыгар көмөлөһөөрү түмсэллэр. Эһиги өйөбүлгүт кинилэргэ да, биһиэхэ барбытыгар да улахан суолталаах. Үлэҕит-хамнаскыт, өйөбүлгүт Кыайыыны чугаһатар, байыастар санааларын көтөҕөр, — диэн кини эттэ.

Маны тэҥэ, кини Светлана Диодорова-Лаврентьева нөҥүө байыастар чугас дьонноругар судаарыстыбанай уонна муниципальнай архыыптарга байыаннай дьайыы кыттыылаахтарын докумуоннарын хомуйууга үлэлэрин иһин махталын тиэртэ.

— Байыастар төрөппүттэрэ ыччаты патриотическай иитиигэ улахан үлэни ыыта сылдьаллар. Национальнай бибилэтиэкэҕэ биһиги кыттыыбытынан «СВОи родные» быыстапка бастайааннай үлэлии турар. Бу быыстапка Аҕа дойдуну көмүскээччилэргэ — саллааттарга, миэдиктэргэ, волонтердарга ананар, — диэн байыаннай сулууспалаах ийэтэ кэпсээтэ.

Кинилэр байыастарга уонна дьиэ кэргэттэрин чилиэннэригэр уйулҕа өттүнэн көмөнү оҥоруу туһунан эмиэ кэпсэттилэр.

Санатар буоллахха, билигин Саха сирин олохтоохторо анал байыаннай дьайыыга кыттыыларын туһунан докумуоннары архыыпка хомуйуу үлэтэ бара турар. Архыыпка бастайааннай харайыыга докумуоннары, хаартыскалары, суруктары, киниискэлэри, күннүктэри, ахтыылары, ырыалары, хоһооннору, уруһуйдары, ыстатыйалары туттарыахха сөп.

Ил Дархан, бырабыыталыстыба пресс-сулууспата.