Ил Дархан байыас Винокуров кэргэнин көрсөн кэпсэттэ

Ил Дархан Айсен Николаев бүгүн, тохсунньу 12 күнүгэр, «Аҕа дойдуну көмүскээччилэр» байыастары өйүүр пуонда филиалыгар хантараагынан сулууспалыыр байыас кэргэнин көрүстэ.

Хантараагынан сулууспалааччы билигин байыаннай дьайыы зонатыгар баар. Кини  бу иннинэ «Боотур» добровольческай этэрээккэ сылдьыбыт.

Ил Дархан байыас дьиэ кэргэнин үүммүт саҥа сылынан эҕэрдэлээтэ, аҕалара сотору кэминэн дьиэтигэр этэҥҥэ төннөн кэлэригэр уонна барыта этэҥҥэ буоларыгар баҕарда.Оттон байыас кэргэнэ хардатын өрөспүүбүлүкэ салалтатыгар болҕомтолорун уонна көмөлөрүн иһин махтанна.

Дьиэ кэргэн түөрт оҕолоох. Винокуровтар улахан кыыстара институтка төлөбүрдээх үөрэхтэн тус сыаллаахха көһөрүгэр көмө оҥоһуллубут итиэннэ үөрэҕин бүтэрдэҕинэ үлэ буларыгар СӨ Инновация, сыыппара сайдыытын уонна инфокоммуникационнай технологияларга министиэристибэтэ өйөбүлү оҥоруоҕун туһунан этиллибит. Оттон орто кыыска «Аҕа дойдуну көмүскээччилэр» пуонда филиалыттан «Артек» норуоттар икки ардыларынааҕы оҕо киинигэр сынньанарыгар путевка туттарыллыбыт.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа Андрей Сорокин түһэриитэ, СИА