Ил Дархан Беларусь Өрөспүүбүлүкэтигэр Арассыыйа посолун кытары көрүстэ

Балаҕан ыйын 30 күнүгэр Ил Дархан Айсен Николаев уонна Беларусь Өрөспүүбүлүкэтигэр Боломуочуйалаах посол Борис Грызлов Минскэйгэ  оробуочай көрсүһүүлэригэр Арассыыйа-Беларусь сыһыаннаһыыларын бөҕөргөтүүгэ Саха сирин оруолун дьүүллэстилэр.

Салайааччылар Саха сирин уонна Беларусь бырабыыталыстыбаларын икки ардыларыгар түһэрсиллибит Сөбүлэһии быһыытынан,  эргиэҥҥэ-экэниэмикэҕэ уонна култуураҕа бииргэ үлэлээһин түмүктэрин, инникитин сибээһи кэҥэтии кэскилин кэпсэттилэр. Чуолаан табаар эргиирин туһунан кэпсэтии барда, Айсен Николаев бэлиэтээбитинэн,  бу көрдөрүү 2020 сылтан 8-тан ордук төгүл улаатта. Кини ону сэргэ бырамыысыланнаска, тыа хаһаайыстыбатыгар, эргиэҥҥэ уо.д.а. салааларга бигэ сибээс баарын бэлиэтээтэ.
Ураты үчүгэй түмүктэр успуорт эйгэтигэр хардарыта бииргэ үлэлээһиҥҥэ баалларын бэлиэтээтилэр. Быйыл сайын Беларусь спортсменнара Дьокуускай куоракка «Азия оҕолоро» успуорт норуоттар икки ардыларынааҕы VIII оонньууларыгар аан бастаан кыттан, мэтээлинэн ааҕыыга үһүс миэстэни ылбыттара.

Университеттар уонна наука тэрилтэлэрин кытары бииргэ үлэлээһин туһунан кэпсэтии кэмигэр устудьуоннары атастаһыыга холбоһуктаах бырагыраамалары олоххо киллэриигэ үөрэх тэрилтэлэрин икки ардыларыгар быһа сибээһи олохтуурга былааннаннылар.
Ону таһынан көрсүһүү кэмигэр креативнай индустрия эйгэтигэр, санаторийга-куруорка сынньаныыга уонна эмтэниигэ уопуту атастаһыы туһунан, үүнэр көлүөнэни патриотизм тыыныгар иитии боппуруостарын кэпсэттилэр.
Саха сирин уонна Беларусь Өрөспүүбүлүкэтин хардарыта бииргэ үлэлээһиннэрин төрүтүнэн эргиэҥҥэ-экэниэмикэҕэ уонна култуураҕа бииргэ үлэлээһин туһунан 1997 сыллаахха ылыллыбыт Сөбүлэһии буолар. 2021-2024 сылларга Сөбүлэһиини олоххо киллэрии тэрээһиннэрин былаанын үлэтэ түмүктэнэр.