Ил Дархан Беларусь Өрөспүүбүлүкэтин успуорка уонна туризмҥа миниистири кытта көрүстэ

Ил Дархан Айсен Николаев бэс ыйын 25 күнүгэр Беларусь Өрөспүүбүлүкэтин Успуорка уонна туризмҥа миниистирэ Сергей Ковальчугу кытта көрүстэ. Миниистир дэлэгээссийэтин кытта «Азия оҕолоро» норуоттар икки ардыларынааҕы спортивнай оонньуулар тэрээһиннэригэр кыттыыны ылыахтара.

«Эһигини уонна Белоруссия сүүмэрдэммит хамаандатын «Азия оҕолоро» оонньууларга  кэлбиккитинэн эҕэрдэлиибин. Оонньуулар идиэйэтин өйөөн, маннык бэртээхэй дэлэгээссийэлээх кэлбиккитигэр махтанабыт. Белоруссия спортсменнара мэлдьи саамай үрдүк таһымнаах күрэхтэһии пъедесталыгар  көрөр буоларбыт. Биһиэхэ оонньуу географиятын кэҥэтии олус суолталаах. Быйылгы күрэхтэһиилэргэ аан дойду 24 дойдутуттан, ону тэҥэ Арассыыйа федеральнай уокуруктарыттан араас хамаандалар кытталларын биллэрбиттэрэ. «Азия оҕолоро» — бу норуоттар икки ардыларынааҕы саамай улахан оҕо күрэхтэһиитэ буолар», — диэтэ Айсен Николаев.

Сергей Ковальчук Беларусь Өрөспүүбүлүкэтин Бырабыыталыстыбатын, успуорт уопсастыбаннаһын уонна бырааттыы Белоруссия норуотун ааттарыттан итии-истиҥ эҕэрдэтин Саха сирин норуотугар тиэртэ уонна «Азия оҕолоро» оонньууларга кыттарга ыҥырыы иһин махтанна.

«Биһиги устуоруйабыт Саха сирин устуоруйатын кытта тэҥнээх. Аҕа дойду Улуу сэриитин сылларыгар Саха сирин үгүс бэрэстэбиитэллэрэ биһиги дойдубут территориятыгар сэриилэспиттэрэ. Ону биһиги өйдүүбүт. Беларусь Өрөспүүбүлүкэтигэр өлбүт буойуттары кэриэстииллэр. Хас биирдии пааматынньыгы, мемориаллары харайабыт, көрөбүт. Бу биһиги уопсай устуоруйабыт», — диэн бэлиэтээтэ Сергей Ковальчук.

Беларусь Өрөспүүбүлүкэтин успуорка уонна туризмҥа миниистирэ күрэхтэһиигэ кэлбит дэлэгээссийэ састаабыгар 144 спортсмен баарын бэлиэтээтэ.

«Азия оҕолоро» оонньуулара биһиэхэ олус наадалаах. Онон маннык улахан дэлэгээссийэнэн кытта кэллибит. Дьокуускайга Беларусь Өрөспүүбүлүкэтин национальнай олимпийскай кэмитиэтин Бэрэсидьиэнэ Виктор Александрович Лукашенко кэлэ сырытта. Бу биһиги «Азия оҕолоро» сайыҥҥы оонньууларга бастакы кыттыыбыт. Оҕо успуорда бүгүн — биһиги кэскилбит, сайдыыга инникибит. Бүгүн биһиги успуорка олус судургута суох кэми тулуйабыт. Эйэлээх дойдулары уонна өрөспүүбүлүкэлэри кытта маннык тэрээһиннэргэ кыттан, спортивнай пуорумнары тэрийэн ыытар кыахтар бааллар», – диэтэ Сергей Ковальчук.

Көрсүһүүгэ Беларусь Өрөспүүбүлүкэтин уонна Саха сирин икки ардыларыгар успуорт уонна туризм хайысхаларыгар бииргэ үлэлээһин боппуруостарын дьүүллэстилэр. Ил Дархан Айсен Николаев туризмы кытта холбоһуктаах бэстибээллэри, бэлиэ тэрээһиннэри, ол иһигэр айар-кут индустриятын сайыннарыы чэрчитинэн ыытарга этии киллэрдэ.

Көрсүһүүгэ СӨ Бырабыыталыстыбатын бэрэссэдээтэлин солбуйааччы Сергей Местников, СӨ Физическэй култуураҕа уонна успуорка миниистирэ Леонид Спиридонов, СӨ Урбааҥҥа, эргиэҥҥэ уонна туризмҥа миниистирэ Тимур Ханды, «Азия оҕолоро» норуоттар икки ардыларынааҕы кэмитиэт Бэрэсидьиэнэ Владимир Максимов, Беларусь Өрөспүүбүлүкэтин успуорка уонна туризмҥа отделын начаалынньыга Сергей Горохов кытыннылар.