Ил Дархан бэлитиичэскэй сэбиэт мунньаҕын ыытта

Бүгүн, ыам ыйын 31 күнүгэр, Ил Дархан Айсен Николаев «Биир ньыгыл Арассыыйа» баартыйа эрэгийиэннээҕи бэлитиичэскэй сэбиэтин мунньаҕын ыытта. Кини бу күннэргэ буолан ааспыт баартыйа барыллаан куоластааһынын түмүгүн туһунан санаатын үллэһиннэ.

Кини Саха сирэ куоластааһыҥҥа кырдьык сөптөөх түмүгү көрдөрбүтүн бэлиэтээтэ. Барыта 500-тэн тахса киһи хандьыдаатынан туруммута, оттон 90-тан тахса тыһыынча өрөспүүбүлүкэ олохтооҕо куоластаабыта.

«Куоластааһыҥҥа хас биирдии сэттис быыбардааччы кыттыбыт диэххэ сөп. Ол аата дьон барыллаан куоластааһыҥҥа «Биир ньыгыл Арассыыйа» баартыйа кинилэр санааларын учуоттуур сөптөөх мэхэньиисимнээҕин уонна өрөспүүбүлүкэ инникитигэр сабыдыаллыыр күүстээҕин көрдүлэр. Биһиги баартыйабытыгар саҥа сүүрээн киирэригэр сыалы-соругу туруорабыт. Барыллаан куоластааһыны дьоһуннаахтык ааспыт хандьыдааттар билигин биһиги хамаандабытыгар киирдилэр. Кинилэр бары баартыйа үлэтигэр кыттыспытынан барыахтара уонна Саха сирэ сайдарыгар бырайыактары олоххо киллэриэхтэрэ».

Мунньах түмүгэр, бастатан туран, өрөспүүбүлүкэ инникитин туһугар кыһаллар уонна Бэрэсидьиэн баартыйатын тутуһар бэлиитикэтин өйүүр быыбардааччыларга махтанарын эттэ.