Ил Дархан бэтэрээннэргэ Улуу Кыайыы 80 сылынан үбүлүөйдээх бэлиэлэри туттарда

Бүгүн, муус устар 28 күнүгэр, Ил Дархан Айсен Николаев «Үлэ киһитэ» бириэмийэни туттарыы кэмигэр Улуу Кыайыы 80 сылынан алта бэтэрээҥҥэ үбүлүөйдээх бэлиэлэри туттарда.

“Бу саалаҕа бүгүн биһигини кытта тыл бэтэрээннэрэ бааллар. Кинилэргэ, аан дойдуну фашизмтан босхолообут норуоппут улуу хорсун быһыытын туоһуларыгар, сүгүрүйүөхпүн баҕарабын. Аҕа дойду Улуу сэриитин сылларыгар биһиги Сахабыт сирин дьоно-сэргэтэ эдэрдиин-кырдьаҕастыын “Барыта фроҥҥа, барыта Кыайыы туһугар!” диэн үлэлээбиттэрэ – диэн бэлиэтээтэ Айсен Николаев.

«Мин бүгүн 90 сааспын туоллум, 1935 сыллаахха төрөөбүтүм. Быйыл Улуу Кыайыыны 80-с төгүлүн чэгиэн доруобуйалаах көрсүөм. Бу миэхэ улахан дьол. Мин тыл бэтэрээнэбин. Сэрии ыар сылларыгар биһиги, сэрии оҕолоро, улахан дьону кытта тэҥҥэ үлэлиир этибит. Аҕам ыраах үлэ фронугар ыҥырыллыбыта, ийэм уонна мин холхуоспутугар үлэлээбиппит. Биһиги хаһан да фашизм эмиэ төбөтүн өрө көтөҕүө диэн эрэммэт этибит. Байыаннай дьайыыга мин икки сиэн бырааттарым кыттыыны ыллылар. Кинилэртэн биирдэстэрэ сэриилэһэ сылдьан бааһырбыта. Хорсунун иһин уордьан кавалера. Иккис эдэр киһи Курскай уобалас босхолооһунугар кытта сылдьар. Биһиги сэрии түргэнник түмүктэнэригэр баҕарабыт», — диэн бэлиэьээтэ харда тылыгар  тыыл уонна үлэ бэтэрээнэ, Доҕордоһуу уонна Полярнай сулус  уордьаннар кавалердара, СӨ норуотун хаһаайыстыбатын үтүөлээх үлэһитэ Будимир Слепцов.