Ил Дархан «Билии» уопсастыбаҕа саҥа соруктары туруорда

Ил Дархан Айсен Николаев «Билии» уопсастыба Саха сиринээҕи салаатын Кэтээн көрөр сэбиэтин мунньаҕын ыытта.

Онно тэрилтэ 2023 сыллааҕы үлэтин түмүгүн уонна быйылгы былаанын дьүүллэстилэр, кини өрөспүүбүлүкэ куораттарыгар уонна оройуоннарыгар сырдатар лиэксийэлэри элбэтэргэ эттэ диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Саха сирин баһылыга Арассыыйа «Билии» уопсастыбата сырдатар үлэтин суолтатын улаханын бэлиэтээтэ, чуолаан – аныгы усулуобуйаҕа. Кини Арассыыйа Бэрэсидьиэнэ Владимир Путин билии-көрүү уопсастыба биир улахан суолталаах сыаннаһынан – араас саастаах дьону уонна интэриэстэрин тардарын туһунан этиитин холобурга аҕалла. Чуолаан «Билии» уопсастыба сүрүн оруола итиннэ сытар.

«Арассыыйа судаарыстыба уонна гражданскай уопсастыба быһыытынан билигин көрсөр утарсыыларыгар сүрүн факторынан буолар дии саныыбын. Биһиги уопсастыбабытын уонна элбэх норуоттар бииргэ сүбэлэһэн олорууларын араартыы сатыыр кэмнэригэр биһиги духуобунай-сиэр-майгы иитиитин сырдатыыны утары туруоруохтаахпыт», — диэн Айсен Николаев тоһоҕолоон бэлиэтээтэ.

Ил Дархан этэринэн, уопсастыбаҕа сырдатар үлэ хас биирдии салааҕа өйөнүллүөхтээх, тэрилтэлэр салайааччылара кумааҕыга эрэ буолбакка, тус бэйэлэрэ кыттыахтаахтар. Баһылык «Лиэксийэлэр – салайааччылары кытта экскурсиялар» бырайыакка кыттыытын уопутун үллэһиннэ, эдэр дьон, ордук Арассыыйа саҥа эрэгийиэннэриттэн, биһиги дойдубут туһунан билиигэ талаһарга улахан интэриэстээхтэрин бигэргэттэ.

«Билии» уопсастыба Саха сиринээҕи салаатын бэрэссэдээтэлэ Анатолий Николаев иһитиннэрбитинэн, билигин өрөспүүбүлүкэҕэ 128 лектор регистрацияламмыт. Тэрилтэ үлэтэ көхтөөхтүк 2023 с. иккис аҥарыгар саҕаламмыт. Ити кэмҥэ 151 сырдатар тэрээһин ыытыллыбыт, 9,7 тыһ. киһи онно кыттыбыт. 2024 с. кини 560 сырдатар туһалаах тэрээһини ыытан, 14,5 тыһ. киһини хабар сорук турарын эттэ.

Айсен Николаев Бүтүн Арассыыйатааҕы тэрилтэ киэҥ партнерскай ситимнээх, бэйэтэ сырдатар үөрэтэр бырайыактардаах биир саамай күүстээх салаатын быһыытынан буоларыгар үлэни ыытарга Кэтээн көрөр сэбиэккэ соруйда.

Онуоха лектор куорпуһун сайыннарыы, лектордары сүүмэрдээһин уонна үөрэтии, истээччилэр араас категорияларыгар дьоһуннаах тиэмэлэри туруоруу, сырдатар бырайыактар уонна информационнай үлэ саҥа көрүҥнэрин тэрийии сүрүн суолталаах буолуохтаах.

2024 сылга үлэ былаана Дьокуускай куоракка эрэ буолбакка, Саха сирин оройуоннарыгар лекциялары кэҥэтии буолуохтаах.

«Өрөспүүбүлүкэ сырдатар үлэни тэрийиигэ улахан кыахтаах. Биһиэхэ барыта баар – Дьокуускайдааҕы епархия үйэ аҥардааҕы сырдатар нэһилиэстибэтиттэн саҕалаан өрөспүүбүлүкэ научнай оскуолаларын ураты дастайаанньатыгар тиийэ, түҥ былыргы элбэх омуктаах култууратыттан саҥа креативнай индустрияҕа тиийэ», — диэн Ил Дархан бэлиэтээн эттэ.

Арассыыйатааҕы «Билии» уопсастыба 2015 с. дойду Бэрэсидьиэнин ыйааҕынан тэриллибитэ.