Ил Дархан бириэмийэтэ Ирина Стрекаловскаяҕа туттарылынна

Судаарыстыбаннай академическай нуучча драматическай тыйаатырыгар Славянскай сурук-бичик уонна култуура күнүгэр анаммыт «Живи и здравствуй, Русь святая!» үөрүүлээх киэһэтигэр Кирилл уонна Мефодий аатынан Ил Дархан бириэмийэтин туттардылар.

Баһылык бириэмийэтэ култуура нэһилиэстибэтин бөҕөргөтүүгэ уонна харыстааһыҥҥа көхтөөх үлэтин иһин А.Е. Кулаковскай аатынан Норуоттар доҕордоһууларын дьиэтин норуоттар икки ардыларынааҕы сыһыаннаһыыларга отделын сэбиэдиссэйэ Ирина Стрекаловскаяҕа туттарылынна.

Култуураҕа уонна духуобунай сайдыыга миниистирэ Афанасий Ноев бириэмийэни туттарарыгар Ирина Егоровнаҕа идэтигэр бэриниилээҕин, элбэх национальностаах норуоттар биир буолууларыгар кылаатын иһин махталын биллэрдэ.

Бырааһынньык чэрчитинэн Саха сиригэр ыам ыйын 24 күнүттэн бэс ыйын 6 күнүгэр диэри «Великий. Могучий. Правдивый и Свободный» нуучча тылын дэкээдэтэ ыытыллар. Ол чэрчитинэн сырдатар тэрээһиннэр, кэнсиэртэр, быыстапкалар, испэктээктэр ыытыллаллар, диэн СӨ Ил Дарханын уонна Бырабыыталыстыбатын пресс-сулууспата суруйар.