Ил Дархан Булчут күнүнэн эҕэрдэлээтэ

Булчут күнэ өрөспүүбүлүкэҕэ 2012 сылга олохтоммута, онтон ыла Саха сирин олохтоохторун биир күүтүүлээх бырааһынньыгынан буолар. Саха сирин тыйыс усулуобуйатын олоҕо кытаанах буолан, эр дьон сатабыллаах булчут буолалларын, үөрүйэхтэрин үүнэр көлүөнэҕэ иҥэрэллэрин ирдиир.

Бүгүн Ил Дархан Айсен Николаев Саха сирин олохтоохторун Булчут күнүнэн эҕэрдэлээтэ.

— Булчут төһө сатабыллаахтык уонна байанайдаахтык бултууруттан кини дьиэ кэргэнин уонна аҕатын ууһун олоҕо тутулуктанара. Саха сирин бары хотугу норуоттара – дьиикэй кыылы-сүөлү, көтөрү бултуурга үгүс үйэлээх уопуттаахтар, үгэс буолбут ньымалаахтар. Хотугу дьон сиэринэн биһиги эһээлэрбит уонна аҕаларбыт биһигини бултуурга эрэ буолбакка, ону таһынан ийэ айылҕаҕа уонна кыылларга харыстабыллаахтык сыһыаннаһарга үөрэппиттэрэ. Ол да иһин, тыйыс усулуобуйаҕа үөскээн, булчут үөрүйэҕинэн тулуурдаах, бэргэн ытааччы буолан, Аҕа дойду Улуу сэриитин кэмигэр үгүс сахалар бастыҥ снайпердарынан аатырбыттара. Биһиги Иван Николаевич Кульбертиновпыт Аҕа дойду Улуу сэриитин биир саамай бастыҥ снайперынан буолбута. Кини 500 кэриҥэ өстөөх саллаатын уонна эпиһиэрин суох оҥорбута. Бүгүн эмиэ биһиги байыастарбыт эһээлэрин уонна өбүгэлэрин үтүө үгэһин салҕыыллар. Ол иһин сахалары  байыаннай дьайыы сиригэр ытыктыыллар. Кинилэр эт-хаан уонна сиэр-майгы да өттүнэн тыйыс усулуобуйаҕа бэлэмнэр, бэйэ-бэйэлэригэр көмөлөһөллөр, доҕотторун сыаналыыллар. Манна барытыгар биһигини бултааһын-балыктааһын үөрэтэр.

Бу бэлиэ күн үйэлэри уҥуордаан кэлбит булт үгэһигэр, сиэригэр-туомугар сүгүрүйүүнү көрдөрөр. Ону тэҥэ бу булка-алка сиэрдээхтик сыһыаннаһыыга уонна Сахабыт сирин уйаҥ айылҕатыгар харыстабыллаахтык сыһыаннаһарга төһүү буолар.  Байанай тосхойо турдун!