Ил Дархан Арктическай гимназия өрөмүөнүн кэмигэр түмүктүүргэ сорудахтаата

Бүгүн Саха сирин Ил Дархана Айсен Николаев Булуҥ улууһугар үлэлии сылдьар. Тиксиигэ Арктическай гимназия өрөмүөнэ хайдах бара турарын көрдө, учууталлары, төрөппүттэри кытта көрсөн кэпсэттэ.

“Арктическай гимназия оҕолорбут сайдыыларыгар стратегическай суолталаах. Биһиги барыбыт сүрүн сорукпут – өрөспүүбүлүкэ оҕолоро билии ылалларыгар тэҥ таһымнаах усулуобуйаны хааччыйыы. Булуҥ улууһун оҕолоро киин улуус оҕолоруттан итэҕэһэ суох хааччыллыллыахтаахтар”, — диэн эттэ Айсен Николаев.

Гимназия 4 этээстээх дьиэтэ 1988 сыллаахха тутуллубута, билигин манна 300 оҕо үөрэнэр. Хапытаалынай өрөмүөн “Оскуола үөрэҕин систиэмэтин саҥардыы” бырагыраама чэрчитинэн, Арасыыйа бэрэсидьиэнин сорудаҕынан ыытыллар.

Үлэҕэ ыам ыйыгар киирбиттэр, билигин үлэ 30% түмүктэммит. Тутуу матырыйаала 70% хааччыллыбыт, сорҕото атырдьах ыйыгар тиийиэҕэ.