Ыччаты байыаннай-спортивнай бэлэм уонна патриоттуу тыыҥҥа иитии боппуруостарын Ил Дархан Айсен Николаев уонна «Буойун» киин эрэгийиэннээҕи отделениетын дириэктэрэ, норуот дьокутаата Василий Егоров ырыттылар.
Ил Дархан анал кииҥҥэ Дьокуускай куорат ыччатын эрэ буолбакка, өрөспүүбүлүкэ бары оройуоннарыттан баҕалаах үөрэнээччилэри эмиэ түмэргэ сорудахтаата.
Василий Егоров иһитиннэрбитинэн, тэрилтэ муус устар 15 күнүттэн аһыллыаҕыттан бу күннэргэ бастакы курсаннар үөрэҕи ааһан эрэллэр. Кинилэри кытта анал бэлэми ааспыт 20 куратор үлэлиир. Сайыҥҥы кэмҥэ киин иһинэн байыаннай-тиэхиньиичэскэй лааҕыр аһыллан үлэлиэҕэ. Курсаннар «огневой», «тактическай» уонна «инженернэй» дэнэр бэлэми ааһаллар, пилота суох көтөр аппараатынан туһанарга үөрэнэллэр. Бырагыраама Арассыыйа сэбилэниилээх күүстэригэр сулууспалыы барарга бэлэмнэнэр ыччаттарга уонна 14 саастарыттан үөһээ саастаах оҕолорго туһуланар. Ыччаты баҕа өттүнэн байыаннай-спортивнай уонна патриоттуу тыыҥҥа иитиини сөргүтүүнү «Бойобуой ускуустуба Арассыыйатааҕы сойууһун» салайааччылара — РФ Бэрэсидьиэнин Дьаһалтатын салайааччытын бастакы солбуйааччы Сергей Кириенко уонна РФ Бырабыыталыстыбатын Бэрэссэдээтэлин солбуйааччы — Арассыыйа Бэрэсидьиэнин Уһук Илиҥҥи уокурукка боломуочунайа Юрий Трутнев көҕүлээбиттэрэ. 2022 сыл балаҕан ыйыгар бу идиэйэни РФ Бэрэсидьиэнэ Владимир Путин өйөөбүтэ. Бастакы 12 эрэгийиэннэрдээҕи отделениелар Арассыыйаҕа ыам ыйыгар 2023 сыллаахха аһыллыбыттара. Быйыл муус устар 15 күнүгэр өссө 10 субъекка, ол иһигэр Саха сиригэр, «Буойун» киин филиаллара үлэлэрин саҕалаабыттара. Сотору кэминэн маннык филиаллар дойду үрдүнэн барытынан аһыллыахтара.