Ил Дархан быһа эпииригэр 600-тэн тахса ыйытыы киирдэ

Балаҕан ыйын 27 күнүгэр, СӨ Судаарыстыбаннаһын күнүгэр, Айсен Николаевы кытта «Быһа лииньийэҕэ» ыйытыылар билигин да хомулла тураллар. Бүгүҥҥэ күҥҥэ номнуо 647 ыйытыы киирдэ диэн Эрэгийиэни салайыы киинэ иһитиннэрэр. 

Киин иһитиннэрбитинэн, колл-киин нөҥүө 302, оттон Telegram-бот нөҥүө 345 ыйытыы киирбит. Саамай элбэх ыйытыы Дьокуускайтан, Нерюнгриттэн, Алдантан, Өймөкөөнтөн, Абыйтан, Мииринэйтэн, Орто Халыма улууһуттан киирбит.

Саамай элбэхтик ыйытыллар тиэмэлэр — хаарбах дьиэттэн көһөрүү, тутуу, тырааныспар уонна суол инфраструктурата, уопсастыбаннай өҥөлөр, дьиэ-уот уонна хомунаалынай хаһаайыстыбалар, энэргиэтикэ, доруобуйа харыстабыла, үөрэхтээһин уонна социальнай өҥөлөр тустарынан буолаллар.

Биэрии балаҕан ыйын 27 күнүгэр олохтоох бириэмэнэн киэһэ 19:00 чаастан саҕаланар. Ил Дархан үгэс курдук, ыйытыыларга хоруйдуоҕа уонна өрөспүүбүлүкэ салгыы сайдар соруктарын торумнуоҕа.

Биэрии «Саха» НКИХ, «Якутия24», «Россия24» ханаалларыгар, «Тэтим», «Радио России», «Виктория Саха», «СТВ-Радио»  араадьыйаларга, Ил Дархан социальнай ситимнэригэр тахсыаҕа.

Ыйытыылары Эрэгийиэни салайыы киинин Telegram чат-ботун @voprosGlaveYakutii_bot нөҥүө ыытыахха сөп, эбэтэр, колл-киин 8 (4112) 506-006 нүөмэригэр эрийэн ыытыахха сөп. Колл-киин үлэлиир бириэмэтэ: сарсыарда 9:00 чаастан киэһэ 18:00 чааска диэри.

Сиһилии: https://www.sakha.gov.ru/news/12343