Ил Дархан быйылгы сыллааҕы тутууну бэлиэтээн ааста

“Якутия, вперед!” биэриигэ тохсунньу түмүктэрин таһаарар быһа эпииргэ Ил Дархан “Сулустаах” түөлбэҕэ сыл саҕаланаатын кытта оскуола,  сабыылаах каток аһыллыбыттарын кэпсээтэ.

Манна уһуйаан, спортивнай саала үлэлииллэр, сотору поликлиника баар буолуо. Олорор дьиэлэри кытта тэҥинэн социальнай инфраструктура эбийиэктэрэ территорияны кэлимник сайыннарыы бырагырааматынан олоххо киирэ туралларын Ил Дархан тоһоҕолоон бэлиэтээтэ.

“Быйыл 59 социальнай эбийиэк, 12 оскуола, 3 уһуйаан, култуура, доруобуйа харыстабылыгар, о.д.а хайысханан элбэх эбийиэк үлэҕэ киириэ. Саамай үчүгэйэ диэн доруобуйа харыстабылын хайысхатынан бастакы звеноҕа элбэх үлэ барар. Успуорт, физкултуура эбийиэктэрин кытта култуура эбийиэктэрэ тутуллаллар. Олунньуга Үөһээ Бүлүү Харбалааҕар Исидор Барахов аатынан култуура киинэ уонна Амма улууһун Алтаныгар “Тыа сирин кэлимник сайыннарыы” бырагырааманан култуура дьиэтэ үлэҕэ киириэхтэрэ”, — диэтэ Айсен Николаев.