Ил Дархан Бырабыыталыстыбаҕа таһаҕаһы бириэмэтигэр тириэрдэргэ сорудахтаата

Сыл аайы кулун тутарга   кыһыҥҥы  суол сырыыта хаала илигинэ таһаҕаһы тириэрдии күүскэ барар. Кыһыҥҥы суолунан массыынанан таһаҕаһы тириэрдии бириэмэтэ бүтэрэ 1,5 ый хаалла.

Ил Дархан Айсен Николаев улахан боҕомтону хотугу таһаҕаһы тиэйии туһунан сокуон бырайыагар уурарга эттэ. «Хотугу таһаҕаһы таһыы туһунан » сокуон бырайыага дойду Бэрэсидьиэнин сорудаҕынан оҥоһуллубута. Докумуон бары эрэгийиэннэргэ, туһааннаах министиэристибэлэргэ уонна биэдэмистибэлэргэ сөбүлэһиини ааһан РФ Судаарыстыбаннай Дууматыгар киллэрилиннэ.

«Өрөспүүбүлүкэ киллэрбит бары этиилэрэ учуоттаныллыахтаахтар. Бу боппуруостарга дьокутааттары кытары ыкса сибээстээхтик үлэлиэхтээххит» –диэн Ил Дархан эттэ.
Сокуон бырайыагар хотугу таһаҕаһы тиэйиини салайыыга боломуочуйалары араартааһын, хотугу таһаҕаһы тиэйии курууһун быһаарыы, логистика инфраструктуратын ситимин сайыннарыы, о.д.а. киирбиттэрэ.

Айсен Николаев өрөспүүбүлүкэ бырабыыталыстыбата нэһилиэнньэ иннигэр ааспыт сыллааҕы үлэтин отчуотун түмүгүн, бэйэтин аппаратыгар олохтоохтору кытары көрсүһүү түмүгүнэн соруктар испииһэктэрин бэлэмнииллэригэр эттэ.

СӨ Ил Дарханын уонна Бырабыыталыстыбатын пресс-сулууспата