Ил Дархан Черскэйгэ элбэх оҕолоох Кемлиль дьиэ кэргэттэрин көрүстэ

Ил Дархан Айсен Николаев Аллараа Халымаҕа оробуочай сырыытын кэмигэр түөрт оҕону иитэр-үөрэтэр Кемлиль элбэх оҕолоох дьиэ кэргэттэрин кытта көрүстэ.

Бу иннинэ Черскэй бөһүөлэгэр Ил Дархан Айсен Николаев 2019 сылллаахха Егор Викторович уонна Наталья Валентиновна Кемлиль дьиэ кэргэттэригэр сылдьан, оҕолору кытта билсибитэ. Ол сырыыга Айсен Николаевка кырачаан оҕолор үөрэ-көтө ситиһиилэрин туһунан кэпсээбиттэрэ.

Ыал орто уола Николай 5 кылааһын, оттон Күннэй 3 кылааһын үөрэнээччитэ. Оҕолор оскуолаҕа үчүгэйдик үөрэнэллэр. Софья «Северянка» оҕо уһуйаанын выпускницата, быйыл оскуолаҕа үөрэнэ киириэхтээх. Коля саахыматынан үлүһүйэрин, математиканы таптыырын уонна ньиэп үлэһитэ буолуон баҕарарын туһунан кэпсээтэ. Күннэй скрипкаҕа оонньуур. Софья айар дьоҕурдаах, уруһуйдуурун сөбүлүүр.

«Оҕолор улааппыттар, кинилэри кытта сэһэргэһэр олус үчүгэй этэ. Бастакы сырыыбар саамай кырачаан кыыстара олох кыра этэ. Оҥолор бары үчүгэйдик үөрэнэллэр уонна төрөппүттэригэр дьиҥнээх көмөлөһөөччүлэринэн буолбуттар. Коля оннооҕор быһа эпииргэ төлөпүөннээн Черскэйгэ ыҥырбыта. Мэктиэ биэрбит тылбын толордум! Тапталга, кыһамньыга иитиллэн тахсыбыт дьоллоох, бөҕө элбэх оҕолоох дьиэ кэргэттэрбит биһиги өрөспүүбүлүкэбит киэн туттуутунан буолаллар. Хас биирдии саҥа күн кинилэргэ үөрүүнү, сарсыҥҥы күҥҥэ эрэли аҕаллын!» — диэн Айсен Николаев бэлиэтээтэ.  Ил Дархан ыалга кытаанах доруобуйаны, дьолу-соргуну, үөрэххэ ситиһиилэри баҕарда. Оҕолор уруһуйдарын киниэхэ бэлэх ууннулар.

Улахан кыыстара Тамила Нерюнгрига «Арктика» оскуола 11 кылааһын үөрэнээччитэ. Билигин Дьокуускайга «Азия оҕолоро» оонньуу волонтерунан улахан тэрээһиҥҥэ бэлэмнэнэр. Наталья Валентиновна дойдуга Дьиэ кэргэн уонна Саха сиригэр Оҕо саас сылыгар дьиэ кэргэни өйөөһүҥҥэ элбэх быраагыраама олоххо киирэрин, ол иһигэр оҕо доруобуйатын бөҕөргөтүүгэ туһуланарын бэлиэтээтэ. Ол курдук, быраастар мобильнай биригээдэлэрэ ыраах Арктика улуустарыгар үлэлииллэр, оҕолор доруобуйаларын тупсарыыга консультация биэрэллэр. Егор Викторович — удьуор табаһыттарын сыдьааннарыттан биирдэстэрэ, бэйэ дьарыктаах. Наталья Валентина — уопсастыбанньык, «Арассыыйа ийэлэрэ» оройуоннааҕы хамсааһын бэрэссэдээтэлэ, «Колымская правда» хаһыат шеф-эрэдээктэрэ, оройуон Сэбиэтин дьокутаата.