Ил Дархан Черскэйгэ Наталья Кемлиль дьиэ кэргэнин кытта көрүстэ

Бүгүн Ил Дархан Айсен Николаев Черскэй бөһүөлэгэр элбэх оҕолоох  ийэ, «Колымская правда» хаһыат эрэдээктэринэн үлэлээбит, дьокутаат, олоҕун байыаннай дьайыы кыттыылаахтарыгар көмөҕө анаабыт Наталья Валентиновна Кемлиль  дьиэ кэргэнин кытары көрүстэ.

-Бу атырдьах ыйыгар  Наталья Валентиновна олохтон туораабыта. Дьиэ кэргэнигэр дириҥ кутурҕаммын  тириэртим. Билигин Наталья Валентиновна кэргэнэ  Егор Викторович түөрт оҕотун  – Тамиланы, Николайы, Күннэйи уонна  Софияны бэйэтэ иитэр. Биһиги олус истиҥник кэпсэттибит, Натальяны ахтан-санаан аастыбыт. Ыал улахан кыыһа  Тамила Дьокуускайга  авиационнай колледжка үөрэнэ киирбит. Николай саахыматтыырын сөбүлүүр,  физика-математическай оскуолаҕа үөрэниэн баҕарар. Күннэй музыкальнай оскуолаҕа скрипкаҕа үөрэнэр. София кыһыҥҥы каникулга дьиэ кэргэнинэн Дьокуускайга сынньана барыан баҕарар. Оҕолор миэхэ уруһуйдарын бэлэх ууннулар.

Биһиги  Наталья Валентиновна курдук дьону өйдүү-саныы сылдьыахтаахпыт, — диэн Ил Дархан ТГ-ханаалыгар суруйда.