Ил Дархан «Цифровой капитал региона» диэн стратегическай сиэссийэҕэ кытынна

Ил Дархан Айсен Николаев  Москваҕа  судаарыстыбаннай салайыы норуоттар икки ардыларынааҕы бастакы конгреһыгар   «Цифровой капитал региона» диэн стратегическай сиэссийэҕэ кытынна.

Эрэгийиэн салайааччыларын уонна экспертэрин кытта дьон, инвестиция уонна көрөөччү болҕомтотун ылар күрэстэһии хайдах уларыйарын ырыттылар. Бу туһунан Ил Дархан МАХ ханаалыгар иһитиннэрдэ.

— Саамай сүрүнэ, биһиги инфраструктура, үп-харчы уонна каадырдар бииргэ үлэлиир экосистемаларын оҥордубут. Киинэ биир сүрүн хамсатар күүһүнэн  буолла. Биэс сыл иһигэр  —  280 тахса наҕараада,  653,5 мөл. солк. хомуур.  2025 сылга  хомуурга рекорд олохтонно — 280 мөл. солк. Бу 2024 сыллааҕар  74% улахан.  6 мөл. солк. бүддьүөттээх «Диодорова. Против течения» киинэ быракаакка  48,7 мөл. солк. хомуйда. Маны сэргэ «Экстра Синема»  киэҥ далааһыннанан иһэр.  Тас дойдуттан интэриэс улаатар. Саха сиригэр оҥоһуллубут видео-оонньуулар  уонча дойдуга таҕыстылар. 
 
Аныгыс  түһүмэх – цифровой хапытаал суверенитета. Саха сирин сайдыытын корпорациятын иһинэн  федеральнай, аан дойду ырыынагар тахсарга  маркетиҥҥа, дистрибуцияҕа  продюсерскай киини үлэлэтии.  АГУИККИ нөҥүө каадырдары бэлэмнээһин. Сылга үрдүк кылаастаах 100 исписэлииһи үөрэтэн таһаарыы сыала турар.  Онон, Саха сирэ  цифровой хапытаалы салгыы сайыннарыаҕа, — диэн эбэн эттэ.