Ил Дархан дьиэ кэргэннээх үлэһиттэри өйүүргэ сорудахтаата

Айсен Николаев Судаарыстыбаннай Мунньахха (Ил Түмэҥҥэ)  туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ сорудахтаата.

СӨ Ил Дархана Ил Түмэҥҥэ туһаайан этиитигэр бу сыл бэс  ыйыгар дойдубутугар корпоративнай демографическай стандарт бигэргэммитин, сорох үлэ биэрээччилэр (АЛРОСА, «Сахатранснефтегаз», Дьокуускайдааҕы килиэп кэмбинээтэ, Дьокуускайдааҕы цемент собуота) үлэһиттэрин уонна кинилэр дьиэ кэргэттэрин доруобуйаларын тупсарыыга эрдэттэн үбү-харчыны угалларын бэлиэтээтэ. Демография стандартын киэҥник олоххо киллэриини саҕалыырга эттэ, ол иһигэр 2028 сылга диэри болдьоххо социальнай уонна үлэ сыһыаннаһыыларын туһунан өрөспүүбүлүкэтээҕи Үс өрүттээх дуогабары оҥоруу чэрчитинэн. Өрөспүүбүлүкэ бырабыыталыстыбатыттан, Идэлээх сойуустар федерацияларыттан уонна үлэни биэрээччилэр эрэгийиэннээҕи түмсүүлэриттэн дьиэ кэргэттэрин иитэр эбээһинэстээх үлэһиттэри өйүүр дьаһаллары саҥа сөбүлэһиигэ киллэрэллэригэр көрдөстө.

Этиилэргэ оҕо төрөөһүнүн иһин эбии төлөбүр, үөрэх уонна доруобуйа харыстабылын ороскуотун толуйуу, дьиэ боппуруоһугар көмө, ону тэҥэ, үлэ имигэс графига уонна эбии сынньалаҥ күннэрэ киирэллэр.

Үлэни уонна дьиэ кэргэни ситиһиилээхтик дьүөрэлиир кыах төрөппүт буолууга уонна дьиэ кэргэн сыаннастарын бөҕөргөтүүгэ чахчы бастыҥ көҕүлээһин буолар.

Санатан эттэххэ, быйыл ахсынньы 15 күнүгэр социальнай уонна үлэ сыһыаннаһыыларын бэрээдэктиир өрөспүүбүлүкэтээҕи үс өрүттээх хамыыһыйа мунньаҕар идэлээх сойуустар федерацияларын бэрэссэдээтэлэ Николай Дегтярев Сөбүлэһии бырайыагар үлэһиккэ оҕо төрөөтөҕүнэ биир кэмнээх төлөбүрү олохтуур туһунан  этии киллэрбитэ. РФ нолуокка кодекса уонна 2026 сыл тохсунньу 1 күнүттэн НДФЛ-тан уонна страховой төлөбүртэн босхолонор,  үлэ биэрээччи үлэһиккэ төлөбүрүн кээмэйэ 1 мөлүйүөн солкуобайга диэри үрдээтэ.

Айсен Сергеевич 25 тыһыынчаттан тахса киһи дьадайыы таһымыттан тахсыбытын туһунан иһитиннэрдэ. Хамнас алын кээмэйин өссө 20,7% үрдэтии 2026 сыл тохсунньу 1 күнүгэр былааннанар, 2026 сылга өрөспүүбүлүкэҕэ  судаарыстыбаннай салаа 117 000 үлэһиттэригэр хамнас пуондата былырыыҥҥытааҕар 34,3 млрд солкуобайынан эбиллиэҕэ. Олохтоох бэйэни салайыныы туһунан саҥа сокуон 2026 сыл тохсунньу 1 күнүттэн олоххо киириэҕэ, олохтоох муниципальнай үлэһиттэр хамнастарын үрдэтэр усулуобуйа тэриллиэхтээх. Ол курдук, Ил Дархан Саха сирин Идэлээх сойуустарын федерациятын хамнас бэлиитикэтин туһунан позициятын толору өйөөтө.

СӨ Идэлээх сойуустарын федерацията өрөспүүбүлүкэ аҕа баһылыга туруорбут 2026 сыллааҕы соруктарын дьиэ кэргэни өйөөһүн, сөптөөх үлэ, национальнай доруобуйа бэйэ-бэйэлэрин кытта ситимнээх бастакы күөҥҥэ сылдьар социальнай сөптөөх бэлиитикэни оҥорууга кэлим ньыма быһыытынан көрөр. Бырабыыталыстыба, профсоюзтар, үлэ биэрээччилэр холбоһуктаах күүстэрэ бу улахан суолталаах хамсааһыннары олоххо киллэрэргэ, хас биирдии ыал чэгиэн буолуутугар уонна бүтүн Саха сирэ чэчирииригэр саҥа кыахтары үөскэтиэхтэрэ диэн эрэллээхпит.

СӨ Идэлээх сойуустарын федерациятын пресс-сулууспата.