Ил Дархан Дмитрий Коркин турнирыгар сырытта

Сэтинньи 14-16 күннэригэр Дьокуускайга Дмитрий Коркин турнира өрө көтөҕүллүүлээхтик, уоттаахтык-күөстээхтик буола турар. Ил Дархан Айсен Николаев манна сырытта. 

Кини «Триумф» успуорт уораҕайыгар буола турар далааһыннаах күрэхтэһии ураты күүһү, эрчими биэрэрин бэлиэтээтэ.

—Тустууну сэҥээрэн көрөөччүлэри кытта Дмитрий Коркин аатынан норуоттар икки ардыларынааҕы көҥүл тустуу турнирыгар сырыттым. Киһи тылынан кыайан эппэт сөҕүмэр тэрээһинэ. Тыҥааһыннаах түгэннэргэ саала иһэ соҕотохто чуумпуран хаалар, ити хас биирдии спортсмен туттуутун-хаптыытын кыраҕытык кэтээн көрөллөр, кинилэр тустарыгар ыалдьаллар. Тустууктар киирсиилэрэ чаҕылхай, күүстээх хапсыһыы, — диэн бэлиэтиир Айсен Николаев.

Коркин турнира үгэс курдук аан дойду тустууктарын болҕомтолорун тардар. Быйыл сэтинньи 14-16 күннэригэр буола турар күрэхтэһиигэ уонтан тахса дойду бэрэстэбиитэллэрэ түмүстүлэр. Көбүөргэ Австралия, Азербайджан, Куба, Кыргызстан, Хотугу Македония, Монголия, Таджикистан, Соҕуруу Корея, Япония уонна Арассыыйа эрэгийиэннэрин спортсменнара, барыта 200 тустуук күөн көрсөр. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Сиһилии: https://www.sakha.gov.ru/news/15485

Хаартыскаларга Андрей Сорокин түһэриитэ, ЯСИА